#NSS愛情
[SSC] 想同大家分享一個$500愛情故事✨
小妹今年中一，有一個讀LSC嘅前男朋友，或者呢啲就係puppy love 冇可能永久但係我真係好愛佢⋯⋯
每次望住佢笑，我都會跟住佢笑⋯佢對我來講已經係生命嘅一部份⋯⋯希望我寫完呢篇野就可以放低，唔知你又睇唔睇到呢？
我同佢係三年級識嘅，嗰陣時同佢完全冇任何交集，講過嘅嘢一定只有10句以內，一啲都唔熟，就好似係關係普通嘅同學。
去到五年級升六年級嘅暑假，有一次打機，佢有份一齊，後來打咗幾轉就開始熟咗少少，最後仲交換咗電話號碼。熟咗之後，我哋都keep住有一齊打下機，我好記得嗰陣時係約咗係每日嘅8:30，後尾我記得你講過你足球有練習，唔可以日日都打，可能我嗰陣時同你只係普通朋友，我冇乜特別感覺。後來我哋真係越嚟越熟，我成日逼你叫我做姐姐，然之後你係我細佬⋯去到大約一月嘅時候，我遊戲嗰張號俾人盜用咗，嗰陣時我哋就開始少咗好多交集。
去到二月中，我記得你係因為你跌壞咗你部電話，之後問我借$500 ，我當你係friend，所以借咗俾你，去到三月，呢段契約愛情就開始la⋯
3月21號，我好記得我係因為分咗手冇幾耐，唔忿氣之後我同你講，同我拍拖一個月，我唔使你還錢，後來你都應承咗，之後我諗諗吓，不如改做三個月，你初頭的確係唔肯㗎，但係你最後話你呢排冇乜嘢玩所以願意。拍拖開頭，我同你講做返一啲小學雞愛情應該做嘅嘢，無論你願唔願意都好我都逼你做。
3月25號我哋第一次嗌交，我同佢講你唔使對我咁好，你唔需要每日朝早同我講早晨，每日夜晚同我講早唞，後尾你話咁咪唔講囉。去到3月26號，你生日我同你講sorry成篇長文，之後你話你唔嬲我，其實我諗諗吓都係嘅，我哋又唔係真係拍拖，可能只係我諗多咗⋯
去到四月幾，我鍾意咗一個好耐好耐嘅男仔佢同我講佢只係當我係金魚，我即刻放負，後來第二日你去咗氹我，後尾講講吓，你又講咗另外一個故事，出奇地又嗌交，然後你又氹番我，可能就係嗰一刻，我鍾意咗你。
四月尾，我同你講不如分開啦做返朋友，我驚我真係會鍾意咗你，你唔肯，其實我幾開心㗎，因為我覺得取消我係你心入面有一個地位，有時我真係好掛住你，但係我又唔知我可以用咩身份嚟搵你。
去到5月18 ，星期二嚟㗎，終於坦白左，你問咗我一個問題，究竟我對你嘅諗法係點樣，我有猶豫過究竟我應唔應該同你講我鍾意咗你，最後我做咗一個明智嘅決定，我講咗我鍾意你，當我以為我會俾你拒絕，你同我講你都有少少鍾意咗我，你知唔知我真係開心到癲咗⋯⋯我最開心嘅日子終於嚟啦，我哋愛情並唔轟轟烈烈，而係平平淡淡。
去到六月初，有一排成日同我借錢，我開始有少少懷疑緊你係咪鍾意我，因為我鍾意你，我愛你所以我信任何你講嘅嘢，只要係你講嘅我都信⋯我並唔係一個溫柔，體貼嘅女仔，又鍾意呷醋然又任性，我唔鍾意你同女仔有交集，我又敏感喎，我以為你一直只係呃我，你鍾意嘅唔係我，而係一個喺第二個地方嘅女仔。後來你又氹番掂我，我就開始放肆，成日用分手呃你⋯⋯
七月幾，就嚟畢業有一個男仔出現（W)，佢坐我前面嘅右手面，佢成日都撩我玩，專登搬張枱去我後面，我哋成日都俾人影低相，甚至班已經有好多緋聞係關於我哋，直到有一日，你開始覺得有問題，我同你坦白左，佢非禮我，我以為你會好嬲，係咁鬧我亂咁玩，點知你依然可以好溫柔咁同我講，唔使驚，去告佢啦，我真係覺得自己好錯，明明有咗你，我仲要亂咁玩，我同自己講我一定唔可以再亂咁玩，可惜玩就係我嘅本性，無論我幾想戒咗佢，我都係成日玩，仲要越玩越過分⋯⋯後來畢咗業呢件事終於平息左，當然中間仲有好多故事啦⋯⋯
八月啦，初頭經歷咗冷淡期，有一排我對你冇乜感覺，之後我仲要話我想玩幾日，後來我發現冇咗你我根本生活唔到落去，甚至依家都係，講咗話要永遠一齊，可惜最後都比我破壞咗，今日你同我講咗一個故仔，你同我講你仲好掛住佢，我呷醋，我覺得你依家都仲鍾意佢，我唔知點解我可以咁低能，明知你而家唔鍾意佢，我都開始亂咁作林，最後我癲咗，同你講分手，你挽留我，我又唔肯，你同意左之後，我驚咗，當我挽留返你，你唔願意啦，嗰一下我終於知道我永遠會失去你⋯⋯後面仲有一段故事我唔想講啦
可能你都唔記得咗中間好多嘅細節，我哋認識嘅經過，朋友嘅開始，愛情嘅開始，嗌交嘅開始嗌交嘅結束，我知道無論我點講，你都唔會要返我㗎la，我只係想寫返出嚟發洩吓，希望可以快啲放低你，雖然我知道係冇咩可能性，但係我真係好想講，我好愛你我依然好鍾意你，你要我嘅時候，我一定會出現喺你身邊，可惜我需要你嘅時候，你亦都唔會再出現喺我身邊⋯⋯我絕對唔會講我寫緊啲篇野嘅時候，我留緊鼻血，哈哈，我發夢你唔要我，出嚟殺咗我，我驚醒咗之後發現自己流緊鼻血，正當我想搵你嘅時候，我已經唔記得咗你已經唔再屬於我啦⋯⋯
呢個男仔，讀書又叻運動神經又好，又霸道，又可愛，又白癡，又得意，成熟得來又少少任性，矮矮地，幾好攬，又香又軟又嗲，把聲音又狼又奶，鍾意好識體諒人，又溫柔又體貼⋯⋯我都唔明點解你優點可以咁多，卻遇上一個我缺點咁多嘅女仔⋯⋯
希望你可以搵到一個乖乖哋嘅女仔，比我靚，比我叻，唔似我咁任性，唔似我咁鍾意呷醋，
多謝你呢102日嘅陪伴，時間唔長唔短，我唔會祝你地幸福，我祝你快樂，分手快樂，
俾我講多一次啦
小朋友～
我永遠都愛你，永遠都會留喺你身邊⋯
你要我嘅時候我一定會出現係你身邊
Sor for 1999