#NSS個人
[Guest] 興趣真係會受到環境同埋心智影響？
Sorry,篇文可能會有少少長
小妹因為一次書展見到某球會擺咗個乒乓波嘅招生攤檔而開始打乒乓波。講返少少事先，我好細個已經有留意關於乒乓波嘅消息，亦都好鍾意打，所以見到就毫不猶豫報咗。
而為咗令到大家明白得更加透徹 書展嗰間球會下稱C,而另外一間球會下稱P
啱啱嚟到C球會打嘅時候都見有d人打波好勁，仲好記得嗰度係一對三/四，同埋勁同冇咁勁嘅人喺大多數情況下都係跟唔同阿Sir上堂。所以冇話因為唔夠佢哋打而覺得自己好失敗，反而仲好有幹勁學打/睇吓佢哋打成點，偷下師。而有趣嘅地方就係唔會固定跟一個阿sir，所以有時都接觸到嗰班比較勁嘅人。或者係因為嗰度嘅訓練模式比較輕鬆(通常人哋打緊波都可以休息，亦都冇任何體能訓練)所以都算係比較輕鬆。
不過後期C球會因為一d內部嘅事而少咗學生，跟住咁啱又有人介紹間比較好嘅球會(P球會)，所以諗都冇諗就即刻轉。
轉左去P球會之後打波辛苦咗好多，由原本嘅一對三變做一對一，加上P球會對於打波嘅要求高咗好多，亦要每堂做體能，或者呢啲先係真正嘅訓練模式。以前起C球過住一啲皇帝式嘅練波生活，嗰陣嘅我真係好鍾意打波，係鍾意到每一日都上yt睇其他人比賽嘅片。但自從去咗P球會之後，我好少再睇其他人打比賽了…
過咗嗰斷適應期之後，的確我啲體能進步咗好多，再加上如果攞比賽嚟計嘅話，嗰度d人嘅實力都係中上為主，可能我唔甘心自己技不如人，又重拾對打波嘅興趣啦🤣
呢一團火持續左年幾接近兩年直到第三波疫情，有好多地方都關左，球會亦都唔例外。當疫情冇咁嚴峻再返嚟打波嘅時候，我對於打波嘅動作完全冇感覺，我當然知道啲動作係點啦，但當掂到個波嗰下好似完全唔識打咁。嗰年斷斷續續又第四波疫情，我覺得我打波技術倒退咗好多。
到上年嘅六七月度又機緣巧合參加咗比賽班，嗰度絕大部份嘅人技術上都在我之上，我知我會喺佢哋身上學到好多嘢。仲記頭一開始輸咗場波內心會好紋，我以為我輸得多，反而會力爭上游，但係我發現無論我幾努力都唔會得唔到自己想要嘅結果，而佢哋又一直都進步，慢慢覺得輸咗波都係食家常便飯，亦都唔會再好執着，反而呢份平常心令到我冇咗以前嗰份熱血，冇咁鍾意一直以來自己好鍾意嘅興趣，唔通環境真係會影響一個人對於興趣嘅熱誠？
不過我會話都係因為佢哋令到我知道乜嘢係真真正正嘅比賽，聽到比賽呢個詞語亦都以前咁怯，堅持咗咁耐嘅興趣就係因為一個突如其來嘅疫情而改變晒所有事情，其實真係好唔抵。雖然而家啲技術水平都回復得七七八八，但係始終都學咗五六年，都會想進步，加上見到個個人都力爭上游，唔忍心見到自己繼續停留原步，只係希望可以毋忘初衷🥹
多謝睇我呢篇文嘅各位🙇🏻♀️麻煩admin po上ig,thx🙏🏻🙇🏻♀️