#NSS個人
[GUEST] 小妹今年十四歲，就有個朋友識咗11年，由幼稚園識到而家，一直以來都當佢係最好嘅朋友，小學嘅時候相處都唔錯，但係自從到咗中學，佢好似變咗。
小六到中一嗰段時間，因爲要上中學，所以其實小妹阿媽都逼得我幾緊，又成日鬧我，而且學校都成日俾人嫌煩、醜，加上青春期可能容易有抑鬱情緒傾向，小妹當時嘅情緒就長時間都好失落，我本來諗住搵佢傾訴下啦，結果佢話我好似大陸嗰啲黑化小朋友，玻璃心，好有病。其實我都只係想搵個人做下樹窿嗻……我一直當佢最好嘅朋友，估唔到佢會噉諗我。
又過咗一年，我嘅情緒終於正常返啲，但係有時候都會同佢傾訴下，但係佢唔會理我。雖然佢唔理我，其實我覺得朋友之間有唔開心嘅嘢，傾訴係好正常，亦都無再介意佢以前覺得我玻璃心，而且我都成日氹佢開心，希望可以將呢段關係填補。
前嗰排有段時間好忙，冇乜點同佢出去玩，都冇乜點氹佢，而且心情有啲差，就冇乜點理佢，點知佢wts直接block咗我……唔知係咪我太玻璃心，好唔開心。
最近一堆人約出去玩，因爲我有事所以要提早返屋企，返到屋企打開wts發現，有位同學私信我，話今日同我個好朋友傾偈，其實我嗰位好朋友覺得我好煩，有時候喺度散發負能量，真係唔想理我。嗰刻我真係喊出嚟……
各位覺得呢？
同佢識咗成11年，當佢係最好嘅朋友，最好嘅朋友之間……傾訴好唔正常咩？
情緒人人都有，同好朋友傾訴……好惹人煩咩？
而且我都冇諗過，原來佢係咁諗我……
我應該點做……令佢冇咁討厭我？