#NSS個人
[guest] 其實呢件事對我平時嘅生活影響唔大，只不過唔知係咪依家留得係屋企多，諗返起好多往事，搞到個人越嚟越唔開心，甚至諗親都喊。
ps我知一定好多人慘過我，但我只係希望有個位俾我講返呢件事出嚟，唔想留言區變咗鬥慘大會。可能有少少長，不過希望大家睇晒佢🙏
是咁的，我係一個正正常常嘅小康之家長大，屋企唔憂柴唔憂米。而父母都好錫我，不過係我個角度係有啲過分嗰種，即係會因為怕我行路仆街而唔比我行路嗰種（比喻嚟，誇張咗，唔知有冇人明。）同埋因為佢哋好想每一刻都知我做緊乜，所以我依家form6都冇自己一間房。或者好聽啲咁講，佢哋唔係真係監視我到咁，但佢哋從來唔覺得有間房對我嘅重要性。佢哋好鍾意覺得自已高人一等，好似叻過其他人咁，所以由細到大都唔比我跟主流，甚至幫我改咗個冇人識讀嘅英文名（佢哋話有返咁上下知識嘅先會識讀。）但乜都擔心嘅佢哋偏偏同我報咗一間用ole嚟做賣點嘅一條龍中小學。
小學一年級，我識咗兩個好好好好好朋友。不過唔知點解呢度啲家長都係鍾意搞好多活動，所以佢哋識咗幾個月已經去對方屋企sleepover，又會一齊去長洲玩一日，仲試過長假去台灣。不過我父母話因為擔心我，同埋佢哋唔想同其他家長social，所以要我全部拒絕晒。之後佢哋每次講返起嗰啲經歷，講到佢哋兩個玩得幾開心，或者個串魚蛋幾好食，我都會笑住等佢哋講完。我知佢唔係有心left out 我，但一講到某啲話題難免會扯到去嗰啲經歷，個心真係好唔開心。佢哋去玩嘅回憶永遠冇我，睇返啲相都係冇我，明明唔係我問題，而啲朋友又唔係排斥我，但搞到我乜都冇份玩。
到咗小學二年級，我因為知道自己已經miss咗好多嘢，所平時係學校都好主動，好積極。好多活動都見到我，甚至六年級做隊長嗰啲。而我上堂都好鍾意答問題同埋舉手做科長，成績都唔差，所以好多老師都好鍾意我，差唔多年年都有機會做班長。雖然我係校內主動積極，但一到要家長簽名嗰啲活動我就通通冇得玩。學校二年級開始搞好多outing同埋camp，但每一次有呢啲活動，父母都唔會比我去，仲要同我講其他家長唔夠錫佢哋啲仔女先掉晒佢哋去camp，而因為我父母錫我，所以唔比我去嗰啲活動。之後有outing/camp嗰日，因為全級人都走晒，除咗我，所以會掉我去其他級別上堂。啲老師同學冇人識我，呢啲日子嘅小息/午休我多數會去廁所匿埋等打鐘，或者扮忙咁係教員室嗰層徘徊。仲要好多老師見到我個名會唔識讀/讀錯，搞到我要一次又一次尷尷尬尬咁解釋多次我個名個讀法。
我學校放學後好多活動，有興趣班、校隊訓練、制服團隊等等，而我學校普遍鼓勵三年班開始玩課後活動，但我到五年班先join我第一個課後活動，搞到我一個五年級要同班三年級坐埋一齊上堂，仲要佢哋好多本身已經成班friend，我就好似唯一一個突出嚟咁。但可能老師都覺得我太突兀，所以都盡量將我擺喺同年嗰啲人到。因為我join嘅係幼童軍，始終同年嘅人識嘅嘢，考嘅章都比我多。好多時，例如要打結或者紮營，個個都好清楚要做乜，得我一個係其他人後面裝下裝下。而我join咗冇耐都知呢個問題，所以我真係好努力追番個進度。我一做完功課係會上yt搵點樣紮唔同嘅繩結，同埋長期開住幼童軍考章嘅page，希望自己能力範圍內做到幾多就幾多。但真係越做越絕望，好多都係成班一齊先考到，同埋我考緊我啲章嘅同時，其他人都一路考緊，我好似點努力都追唔上。好記得都六年級最後一堂，我望住其他人件衫啲章釘到唔夠位再釘，而我得三個嗰種心情係幾難受。
上到中學，父母的確係開放咗，比我同朋友出街同埋join校隊（雖然上到中四話要注重學業迫我quit晒），不過因為我小學近乎0經歷，音樂運動嘅校隊好多都要基本嘅學術，所以冇一個收我，我唯有玩返童軍。而上咗中學之後，童軍會重新嚟過，同埋我都追得返個追度，好多時玩得比其他同年嘅人好，老師開始搵我參加唔同嘅比賽。我每一次返屋企同父母講我係童軍玩得幾開心，佢哋都拍哂手叫好。但一到出去露營/參加比賽，佢哋即刻話冇得傾，理由係露營要上山下海，覺得我頂唔順，同埋驚啲膳食差，話屋企嘅飯一定好過我上去露營嗰啲。我之後每一次都要返去學校同老師解釋話父母擔心我，唔想我露營/參加比賽，久而久之老師都冇再搵我了。後來我都越玩越悶，quit咗。而家時不時係學校見到童軍蠃返嚟嘅獎杯，同埋攞獎嘅相，我都會覺得原本我都有機一齊比賽，一齊攞住個獎杯影相，但因為父母嘅”愛錫”而冇機會。
坦白講，疫情對我個心理健康好似好咗，起碼全部人都冇得去outing/camp，全部人都冇得參加比賽，咁我就再唔係被left out，掉去其他級別上堂嗰個。不過依家同朋友講電話多咗，好容易會講返以前啲嘢。「記唔記得嗰次小學camp⋯」「嗰次小學bbq陳老師⋯」然後我就係隔離陪笑。佢哋完全唔係有心left out我，甚至唔記得我冇去，呢啲時候我為咗令我自己覺得係學校嘅一分子，我會扮我有份去，例如我會作bbq嗰次李老師請我食棉花糖，但其實佢係請第二個同學食。雖然嗰一刻我好似融入到佢哋，但每次咁樣作完故仔我都唔知自己做緊乜，個感覺好難受，但又冇嘢彌補到。
唔知點解上到中學之後冇咗小學嗰種主動積極。而家諗返，好似好耐冇做過科長/班長，好耐冇join過學校啲活動，好掛住以前無論幾多難關都盡力做到最好，好似打不死咁樣，不過依家都冇機會了。有時我寧願父母求其比我去一啲乜嘢課外活動都冇嘅學校，係乜嘢都冇得玩，但起碼唔會下下都好似比人排斥咁。同埋都就嚟畢業，我同唔係好知我究竟對間學校有冇歸屬感。我好愛呢度嘅校長，校工，老師，同學，好愛呢度嘅一切。但搵睇yearbook，除咗班相，有我嘅相係極少，明明我先係係度讀咗12年嗰個，但叫我講最難忘嘅活動嗰啲，我真係擘大個口得個窿。我都知道冇嘢彌補到，但成日諗返起真係好辛苦。有冇啲方法可以放底，或者睇淡呢啲冇得彌補嘅事？