#NSS愛情
[Guest]
到底我哋係咩關係？
成件事都幾複雜 但我搵唔到一個合適嘅人傾 希望呢度各位可以幫一幫我..
其實我哋到底係咩關係？係朋友？知己？閨密？佢當我係妹？定真係中意我？又或者 關係嘅確立係唔係真係咁重要？
我係一個00後 (05前)而佢係一個90後 相差超過10年 大家都係女 而佢係les 我係bi(有啲唔sure) 佢拍過4次拖都係同女仔 而我拍過兩次都係同男仔 但有試過對女仔有feel
我哋係係2021年5月網上追星識嘅 起初大家都好岩傾 講哂粗口互串大家都唔介意 好好傾 每日都會傾計 由追星講到屋企講到自己 本身自己係好收埋嘅人 但因為陌生人 所以好多秘密都講出去 好似將自己心事講咗出黎咁 就係咁 我開始好依賴佢 有事冇事都搵佢 好想佢陪住我
咁傾咗三四個月 佢就約我出黎見面 嗰排係我生日 佢就咁約我出嚟見一見 送份禮物比我就走咗 呢次係我哋第一次見面 好記得我哋約係地鐵站到見 我好緊張 好擔心自己失禮 手都震哂咁見 但意料之外地我哋好似舊朋友見咁 一啲都唔尷尬 更加令我覺得佢呢個人好特別
係發生呢啲事嘅期間 佢同一佢拍咗拖8年嘅女朋友分咗手 每日都好唔開心 我就陪佢 有時佢會打電話黎乜都唔講 淨係係到喊 我都會好有耐性咁陪住佢 前幾個月 佢又因為佢ex好唔開心 夜晚打比我 話可唔可以見我 補充番先 佢住九龍 我住沙田 嗰陣10點幾 我一聽到電話就即刻飛去搵佢 佢一見到我就攬住我黎喊 我攬到佢好實 攬咗好耐 同佢講 我係到 佢冷靜咗之後好真誠咁問我 你可唔可以應承我 你一直都會係到 一直都攬住我陪住我 我諗都冇諗就答咗可以 嗰刻我先覺得自己動咗真情。
之後落嚟嘅幾個月 我哋相處方式唔同咗好多 冇再互串 冇再講粗口屌大家 變到好sweet 好sweet 佢每一日都會打電話叫我起身 幾早都好 我哋會傾住電話瞓 傾住陪大家做嘢 我哋會叫對方豬豬 明明每一個星期都會見 我哋口中都係會講住好掛住大家 係真心好掛住。
而我係一個好獨立嘅人 通常都係照顧人 但係佢面前 我完全係一個小朋友 而我其實好中意比人照顧 佢會拖住我行路 十指緊扣 行商場幫我推門 行街會行出面 知道我怕黑會拖到我好實 講真 真係好有安全感 呢排因為停堂食 我哋會買嘢食上車食 佢會幫我打點一切 幫我買幫我拎幫我開 準備tissue 準備嘢飲 我要做嘅只係乖乖等食 我哋做嘅嘢好簡單 去野餐 去睇海 去行山 大家都好中意大自然 坐係海邊挨住對方都可以坐一日
我哋每一次一見就會攬 攬到好實 會拖住行 而我哋仲會kiss 雖然只係面 但所以嘢都好自然 一啲都唔尷尬 仲有佢住九龍 因為佢有車 佢每一次都會車我番屋企 係每一次 無論幾夜都好 再自己揸番屋企 我哋每一次見面都會準備少少野比對方 一啲對方會中意嘅嘢 其實真係好sweet
講真 我哋呢段關係真係好好 好舒服 大家都好着緊好依賴對方 試過幾次因為唔捨得分開而喊 佢亦都係我一直好想搵到 好細心 會好照顧我 唔怕我麻煩 我可以做小朋友嘅人 但係過咗一排 我其實有啲驚 到底我哋算係乜？我深知 我哋做嘅行為同情侶冇分別 但其實又係唔係？
所有野都係佢主動先 到底佢係唔係中意我？我一個妹妹 佢真係會中意我？而佢一個大姐姐 我係唔係只係太中意被人照顧？定係係愛？
先唔講性別 我哋相差十幾年 同佢出街會比人覺得係姐妹甚至母女 已經好大障礙 再講我哋都係女.. 香港又咁保守。
年齡加上性別 我哋其實係唔係唔應該再咁落去？好迷惘好無助 會唔會有人幫到我？
Sorry for 1999 thx admin