#NSS家庭
[guest] （長文）小妹今年f2，有個兩歲嘅阿妹。係咁嘅，我阿媽性格同情緒好似有啲問題。
第一，佢成日將啲嘢扭曲到係人哋蝦佢，之後周圍同人講。例如 佢自己唔入房，喺梳化坐到腰痛，之後鬧我唔肯出房，唔肯讓間房俾佢哋。我話 你想入房可以自己出聲同我講。佢話 費時你又話我麻煩啦（我冇印象自己有咁講過，有可能又係佢扭曲出嚟）你唔識自己主動問㗎咩，咁你係咪冇叫我煮飯，我就唔洗煮？
但係小妹屋企細，得360呎（住公屋，單位錯咗嘅唔好意思）阿妹啲玩具又多（阿媽唔捨得丟）要成日出房入房好麻煩，zoom嗰陣攞住部機（部機幾大部）出出入入仲麻煩。所以我無啦啦行出嚟問佢要唔要入房都幾麻煩。
（send訊息叫佢入房冇用，佢唔睇。有時阿妹瞓咗唔可以喺間房嗌出嚟問佢入唔入房，會嘈醒佢）
佢又成日將 自己唔肯做 扭曲成 人哋唔俾 所以佢先唔做，之後就會鬧我。
第二，情緒極暴躁。我同老豆日日俾佢鬧幾十次，十分之九都係求其搵嘢嚟鬧。例如我之前出街嗰陣話 自己唔洗著外套，之後佢叫我著，我聽咗佢鬧一陣之後 我就去著返外套，佢又叫我唔好著，我跪低求佢 佢都隔硬除我件外套，落到樓下，佢又鬧我點解唔聽佢講唔著外套，我話 係你叫我唔好著。佢話 我叫你去死你又唔去？ 嗰下都幾無奈，但係又駁佢唔到。同埋佢對我阿妹係極粗魯極暴躁，成日鬧（偏偏我阿妹又唔係幾聽話）打嘅次數都頗多，一日打四五次咁（打腳，嬲得滯會打面打頭）有時都會打我，不過因為我都大個，佢驚我離家出走/自殺，所以打得比較少。佢成日鬧人成日大叫成日發癲，呢啲舉動其實會嚇親我（因為佢係 無啦啦 發癲），我隔唔時俾佢嚇一嚇，幾崩潰。
第三，（呢個唔關情緒事，不過都滋擾到我）佢啲鼻鼾聲極大，耳塞都冇乜用，我同佢同一間房，再加上我本身就成日失眠，更加唔洗瞓。但係我語氣平靜咁同佢講呢個問題嘅時候，佢唔會改，會話我咁講搞到佢唔敢瞓，之後又鬧我。
我身邊冇人幫到我，我阿爸唔會因為我而鬧阿媽，有時會笑我抵死，因為細個佢哋鬧交嗰陣我都係偏向撐我阿媽（我阿爸咩都唔做淨係打機，脾氣又差，佢月賺2萬但係淨係俾4000我哋3個，打開門食煙 呢啲舉動都令我唔係幾鍾意佢，所以我偏向幫阿媽多啲）同親戚朋友又未熟到可以分享心事嘅地步，所以我唔知點算，請大家幫幫我，點樣改變到阿媽嘅情緒/我自己有咩可以改進。唔該曬admin，多謝大家睇到呢度。
（sor for 1999，太多括弧唔好意思，中文唔好，錯字多唔好意思。我知自己唔係好慘，純碎想知有咩方法可以改善到呢個情況，同埋我比較玻璃心，比較難忍受呢啲事。有咩冒犯到大家嘅，唔好意思）