#NSS家庭
[guest] 我今年form2，住公屋，我父母離婚，我跟阿爸住。喺我小學二年級嘅時候我老豆搵咗個後母，對我唔算好亦唔算差，佢唔會主動同我講嘢，平時亦唔會關心我，我哋每日唔會講超過十句話，之前我都試過同佢溝通，但佢好似唔係好想同我傾計咁。
但最近發生咗件事。我部舊手機用咗4年，我自認用得唔耐，因為我平時粗心大意，所以成日整跌手機，部手機都畀我跌到爛爛哋（有貼mon貼，所以冇暴玻璃亦冇裂痕）部手機有時候會黑屏，就睇唔到個屏幕。有次我部手機2日都一直黑屏，我就開始驚，因為我老豆平時好惡，佢係做地盤，所以對任何嘢都好珍惜，佢有部手機用咗7年，我驚講出嚟佢會鬧/打我。手機黑屏嘅第二日夜晚我同老豆講我手機黑屏，而我講完一大輪之後佢冇鬧我，而係同我講：我買部新手機畀你，你唔好同姐姐講（姐姐係後母，我叫咗佢八年姐姐，我唔叫佢做阿媽係因為我覺得佢做嘅嘢完全唔似一個媽媽，而我同佢八年嚟都冇認認真真咁傾過計，類似朋友以下但又未至於唔識嗰種）我同老豆講手機嗰陣時後母喺房度，所以聽唔到。
買咗手機之後嗰一個星期我都將手機收埋，所以後母冇發現。前幾日，我部舊手機內存滿咗（手機內存32GB）所以做唔到網上功課，逼於無奈我開新手機做功課，跟住後母冇啦啦嚟我張書台攞嘢，就見到我用新手機，我遮都遮唔切。佢就同老豆講：哇 咁有錢啊，我部手機用咗10年，你個女部手機先用得幾多年啊，又唔見你對我咁好blablablabla……。講下講下開始講返舊帳，跟住老豆同後母就因為我部手機吵咗好耐。呢幾日我都唔敢拎新手機出嚟用，我驚會發生第二次世界大戰，想問下大家我宜家應該要做咩平息呢間事