#NSS個人
[guest] 唔知會唔會寫得好長，而且本人寫嘢同表達嘅能力都唔算好好，不過真係好苦惱，希望可以阻阻各位幾分鐘幫我諗吓點同個friend講。
事源係咁嘅，我有個識咗4年嘅女仔朋友，依家我哋兩個都係f2。上年升咗上中學之後佢嘅成績雖然唔係特別好，但係都叫做唔錯，成績中規中矩咁，尤其是地理特別好。咁我最差嗰科就係地理，先得B，佢攞A嘅，所以上年，強調係上年，我間唔時會去問佢關於地理既野，咁我由小學開始英文已經唔錯，佢都慣咗會嚟問我英文，一直都覺得幾好識咗個互補嘅同學做朋友，仲升埋同一間中學。
但係今年開學，嚴格嚟講係上年暑假嘅時候，不過暑假嘅佢鍾意點玩我都冇資格講啦下，佢同個因為成績唔夠升班而轉校嘅同學close咗，咁嗰個同學係轉咗去間band2c嘅學校（冇歧視成份不過嗰度嘅學生大多都唔太有心向學，強調係大多，唔係全部），嗰個同學自然就喺環境嘅影響之下都變「差」咗啦。
講下嗰位轉校嘅同學先啦（為咗令大家更好理解我個friend嘅狀況）佢喺我哋學校讀嘅時候（我地學校係band1a）已經留過一年，可能係covid嘅關係，佢本身嗰個學年都話要勤力啲，爭取升班，不過後尾就…反正最後都係先唔到然後走咗。佢係轉咗校之後識咗班踩滑板嘅朋友（重申都係冇歧視，個班“朋友”有好有壞，不過好多都係唔太“有益”嘅啦）然後就日日都出去踩板，不顧學業，有時甚至踩通宵唔訓，番學校先訓（睇佢ig story知嘅）咁人哋轉咗校，再加上我同佢唔熟，咁我都冇理到啦。
講番重點，我個friend係經過另一個人（下稱q）認識嘅。咁q本來成績都唔算好，掹車邊升嘅，咁我個friend係同q熟先嘅，好似識咗2年定3年。咁q又同轉校嗰個熟咗，咁我個friend自然就因為成日同q一齊玩而識咗轉校嗰個同學。q自從上年暑假就成日同轉校嗰個玩，之後開學都跟埋轉校嗰個踩滑板，都係踩通宵個隻。
我個friend本來唔踩滑板，只係得閒嘅時候有時會去玩下，但係後來唔知點解，應該係因為q嘅關係，佢又買埋滑板，踩埋一份，其實我覺得滑板冇唔好，係正常運動/喜好，但係佢有時會兩三點先番屋企，我有勸過佢但係佢一副唔在意嘅樣，就話咩「玩下咋嘛」「唔緊要啦」咁佢又唔聽我講我都冇計啦，只係有時佢出story我會覆吓「快啲番屋企訓啦唔好玩太晏」「聽日有test阿快啲番屋企溫書訓覺啦」咁佢又話「無所謂啦test咋嘛都唔係計好多啫，好快番屋企訓架喇。」咁但係話曬我地學校競爭真係好激烈，一兩分已經定生死，所以我自己會睇得好緊，佢上年都係，甚至會同我溫通宵，互相問書咁。（勁掛住嗰時）但係今年佢好似真係成個人轉左咁，嚟緊放完聖誕假要考試（唔知admin po嘅時候過咗聖誕假未，反正就係1月頭月中嘅時候要考試，考到月尾）咁我同埋其他同學都開始做功課，有啲甚至已經做完開始溫書，但係佢唔單止唔做功課唔溫書，仲日日出去玩，咁我都明嘅，聖誕（今日25號）係會出街玩嘅，但係佢完全冇要溫書嘅意思，就話「考前一日溫咪得囉」「功課返學前一晚做就得啦」但係我地啲考試內容如果唔提早溫係肯定溫唔曬囉，再加埋啲功課，我真係好驚佢會搞唔掂。我琴晚溫書（其實都唔係溫只係大概“蠟”下啲地理內容，因為我地理係最屎嘅一科）去問佢地理嘅時候，佢話「下？我冇聽書喎，你睇下其他人識唔識。」個吓我覺得佢真係出事。因為佢上年其他科都唔算好好，係靠地理拉分，加上佢今年其他科都唔好，之前個test佢仲差過我，我嗰時安慰佢話唔緊要啦之後考試努力就好，點知佢只係話「合格咪得囉咁高分做乜，我冇唔開心喎我仲以為我會唔合格」
去到今日啦，我碌ig嘅時候見到佢同q同埋之前轉左校嗰個同學同埋一班我唔識嘅男仔（我估應該係個同學轉校之後識嘅“板友”）一齊出去踩滑板，但係今日咁凍佢仲要著短裙，之前我20幾30度著啲膝上裙佢都會話我做咩著咁短，但係佢今日著嗰啲大髀都遮唔到，彎腰就見到pat pat嗰種程度嘅短裙（都係冇歧視短裙嘅意思）咁我就覆佢做咩事著咁短，原來佢係同q同轉校同學約埋一齊著。咁佢哋就去踩板啦，其實咁大風都唔知會唔會吹起不過佢鍾意又想著我都冇再講咩。
但係之後佢哋上咗q嘅屋企，我個friend坐咗上其中一個男仔嘅大髀度，個男仔攬住佢條腰；然後q就同另外一個男仔拖住手爭2cm就錫到咁樣影咗張相，應該係轉校嗰個同學渣機影。咁佢地tag咗嗰兩個男仔嘅ig，我撳入去攬住我friend個男仔個ig度睇，個男仔bio tag咗我個frd仲加咗個粉紅色心（💗）跟住我問我個frd係咪佢新識嘅，做咩個男仔會tag佢。佢話佢哋其實已經識咗4個月，拍咗拖個幾月（其實佢哋冇做過咩特別情侶嘅嘢，不過佢話同個男仔一齊）當下我勁震驚，不過過咗幾秒之後我係紅咗眼眶，我諗緊我幾時開始對佢一無所知，點解佢拍咗拖個幾月我都唔知。當然我冇同佢講，之後覆咗「吓我唔知嘅，你出pool我都未出，祝你同佢99啦」佢like咗我個msg然後冇覆過實際嘅嘢。個下我feel到我同佢前所未有咁疏遠，我唔知幾時開始同我最friend嘅佢疏離咗。
之後我搵咗另一個friend（h）講呢件事。h係轉校嗰個同學嘅ig close friend。佢cap咗轉校同學個story比我睇，q喺佢屋企影咗條片，係轉校嗰個同班男仔喺度食煙飲酒，q就攞住個酒罐，影到個男仔攬住我個friend食煙，然後我個frd攞住罐酒，仲比咗個男仔飲一啖。我個下完全呆曬，唔知佢幾時變到咁。
講番重點，佢買滑板同拍拖呢件事佢父母係唔知嘅，佢塊板要收埋喺q屋企。佢拍拖呢件事更加唔使講，因為佢爸爸係勁錫佢個隻，佢話唔可以比佢屋企人知，尤其是佢爸爸（後來q嚟同我講）。我喺度諗緊我應該點樣同佢講，因為我講嘢係好直，而且我個friend係個隻唔鍾意人哋管住佢嘅人，加上我唔係直接知佢拍拖飲酒呢件事（佢冇直接同我講過係我睇佢story知道嘅）所以如果我同佢講，我驚會講錯嘢/佢會憎我。所以希望大家可以比啲建議我點樣勸佢/間接啲同佢講。因為我唔想冇咗呢個friend，同埋我好驚佢個試考唔好升唔到班。我想下年可以同佢同班。
最後多謝咁多位睇到呢度（或者你中間skip咗啲都唔緊要啦）希望可以得到一啲實際啲勸到佢嘅說話。我知一定有人話咩「呢個friend不如算啦，因住佢帶壞埋你」之類嘅說話，不過我真係希望佢可以番番好似以前咁，更加希望我同佢可以番番以前咁。
最後最後奉獻大家「近朱者赤，近墨者黑」呢句說話唔係講笑，大家帶眼識人，呢個年紀最緊要係讀好書（如果你仲讀緊書嘅話），唔好為咗一時嘅開心而毀咗自己嘅前途。