#NSS個人
[Guest] 想同所有有抑鬱症既人講:
我知抑鬱症既人好辛苦,因為我都有過
覺得自己好廢,係呢個世界生存冇意義,冇人愛自己
呢種諗法成日存在,想令自己諗正面D,但係點做都做唔到,有人同你講,叫你收皮,成日放負,喺度搏關注
你越嚟越覺得自己廢、犯眾憎,萌生自殺既念頭,望住樓梯或者高處會想跳落去,望住手腕會想界落去
甚至你向屋企人表明心情,佢哋只係:“你有D咩壓力?有屋你住,有飯你食,我返工仲攰啦!”屋企人既唔理解往往係壓垮駱駝既最後一根稻草
所以我企左係天台,坐左上欄杆,諗:我存在有意義咩?好似一D都冇,優點?都冇,缺點?如數家珍,但係我個妹係我諗住跳嗰陣call左我,好普通一句:你幾時返屋企?
我即刻喊左出嚟,喊到狗咁,明明身邊就有個愛自己既人,我究竟做緊咩
用左成個月摒除自殺既念頭,而家成個人好返好多(當然有keep住見醫生同社工),不過正面既諗法真係好難(我個人係追星行返出嚟),但係喺你放負嗰陣覆你既人都係愛你或者關心你既
唔好覺得自己冇未來,你而家過既每一分每一秒都係未來,更何況你唔試下又點知未來一定唔好呢?
喺想獲得愛既時候,要學識愛自己先,你唔係廢,唔係冇用,只係未見到自己既閃光點,起碼你誕生係世界既嗰一刻父母係愛你既
我知好老生常談,但係都多謝你睇完,未來既問題需要現在既自己努力,加油💪