#NSS個人
[HKCWCC] 小弟今年Form 5升Form 6，將會喺2022年考DSE。以下係小弟以下幾點升學方面嘅疑慮，請大家幫手解答，唔該晒！
首先，小弟唔知道自己想報讀嘅programme讀嘅內容同小弟心目中係唔係一樣。小弟想讀完大學出來之後去日本嘅2D手繪動畫公司做原畫師（以小弟所知，日本有少數2D手繪動畫公司係請過中國人做正式社員嘅，小弟所知嘅有京都動畫（遲來嘅兩周年紀念😥）同MAPPA。一係去大陸都得，不過當然係去毀夢、視美呢啲手擁作品IP、有能力自行投資出品作品嘅元請公司而唔係無錫廉價外包中割公司嗰種），並以成爲宮崎駿、庵野秀明呢種有能力完全自行出資，對作品創作有完全自主話語權，唔使受到其他大型投資者制肘嘅大牌2D手繪動畫作品導演作爲目標。小弟之前都有上網查過香港有邊間大學有開辦動畫專業學位課程，目前查到有浸大嘅JS2320 (Bachelor of Communication in Film (Animation and Media Arts Concentration) )、鯨大嘅JSSU14 (Bachelor of Fine Arts with Honours in Animation and Visual Effects)同埋嶺大自資Non-JUPAS嘅Bachelor of Arts (Hons) in Animation and Digital Arts。小弟有查過以上三個課程嘅programme structure同course description，但係查完之後仍然唔知道以上課程適唔適合自己。小弟仍然唔了解有幾多course係學日式2D手繪動畫嘅流水線、小弟可以學到幾深入，同埋有乜其他courses對小弟將來嘅工作有幫助。小弟之前又錯過咗啲大學嘅畢業展，搞到小弟無得睇下啲學生作品係唔係符合小弟嘅風格，亦無咗同應屆畢業生同教授交流嘅機會。
小弟宜家好驚以上programme學嘅嘢會唔會滿足到小弟嘅要求，誇張啲講，可能個programme淨係教美國彼思、夢工場嗰種3D CG動畫嘅，咁小弟入到去就會中伏，而小弟亦會浪費咗四年讀對自己嘅事業無幫助嘅programme，同再多四年時間讀自己真正想讀嘅programme，甚至錯過咗進入職場嘅黃金時期。（一般來講，喺日本，2D手繪動畫原畫師都係唔會遲過25歲入行，遲過嘅話就可能會無動畫公司請）小弟知道呢個時候，你哋可能會建議小弟飛去日本讀動畫專門學校，但係一來小弟宜家完全唔識日文（小弟打算考完DSE之後先開始背五十音），二來小弟屋企人無能力供小弟出國留學，三來小弟個人意願都係想留喺香港讀完學士學位，所以都淨係會考慮香港嘅本地大學課程。請問呢度有無讀緊/讀完香港本地大學動畫專業學位課程嘅過來人同小弟解答以上疑問，畀小弟到時可以報讀最適合自己嘅programme？同時，如果可以嘅話，不如你哋都分享下自己嘅經歷，例如啲course會讀乜、學成點、做過乜作品、參加過乜校外比賽、去過邊間動畫公司實習、個系會平時有乜活動、宜家去緊邊間動畫公司做乜等。同埋小弟唔知道自己搵返來嘅programme有無遺漏，如果香港重有其他大學有開動畫專業學位課程，而又適合小弟嘅理想嘅話，歡迎大家介紹埋畀小弟。希望小弟睇完各位嘅回覆之後，會對以上課程更加了解，令自己嘅志向更加堅定，將來成爲箸名2D手繪動畫作品導演之後再以本人嘅創意同精心製作回報大家。
其次，小弟嘅意志好容易受到自己動搖。（唔錯，係自己，唔係人哋）一方面，小弟已經決定咗大學要讀動畫，如果動畫系唔收小弟嘅話，小弟寧願重讀中六或者做自修生重考DSE，都唔要讀小弟唔想嘅學系。小弟屋企人唔反對小弟大學讀動畫，認爲小弟咁大個人應該識得自己做決定。但係，渠哋覺如果小弟JUPAS淨係排動畫嘅話會好冒險（渠哋想小弟直接入大學，唔想小弟無書讀，亦唔支持小弟重考DSE，認爲咁會浪費一年光陰），要求小弟到時排JUPAS要排晒20項，唔可以漏空。但係咁多JUPAS programme入面，（暫時來講）動畫系就係得小弟上面所講嘅JS2320同JSSU14兩個。小弟有諗過Band A3至Band E20排啲相關programme（即係張畢業證書可以用來報讀返動畫系嘅嗰啲，例如電影、創意媒體、視覺藝術等），但係嗰啲programme同動畫一樣要交作品集，而作品集嘅要求又未必同動畫系一樣。小弟唔想畀自己太大工作量，所以自己否決個諗法。小弟希望自己可以說服自己固執，堅持唔係動畫系嘅都唔排。小弟唔希望自己最後會向屋企人跪低，排埋晒啲同動畫完全無關嘅programme，到時自己入讀自己完全唔想讀嘅科目就會後悔成世。
另一方面，小弟下定決心小弟入大學一定要入Year 1而唔要入Year 2或者Year 3，咁先可以讀到最多嘅course同享受四年完整U Life。當然，今次DSE小弟都會做足準備，努力讀書，全力以赴，最好可以第一次就入到自己心儀嘅動畫系。但係萬一小弟失咗手，考唔到「33222」嘅話，小弟會寧願重讀中六或者做自修生重考DSE，都唔要入High Dip/Asso。但係小弟宜家就係成日忍唔住上網查有乜High Dip課程可以駁返上大學嘅動畫系。小弟明知道自己睇得多High Dip嘅課程資料，自己嘅目標就會降低到讀到High Dip就得，但係小弟就係無辦法唔去諗讀High Dip。再者，小弟已經知道咗自己大學要讀乜學系，宜家重心掛掛揀乜programme好會令小弟嘥多咗時間上網查programme資料，專心唔到學業，影響小弟DSE成績。
可能你哋未必畀到有用嘅建議小弟，但係希望小弟分享完自己嘅心事之後可以舒服啲，專心返學業同埋預備作品集，咪係如果考唔到「33222」嘅話就會得個桔。
Sorry for 長文 and 1999