#NSS家庭
[GUEST] 小妹今年15, 一直被啊媽喺電話裝咗個跟蹤app同埋屋企有cam mon 住我。
其實我之前投過稿，好多人都叫我直接同啊媽講，同佢講唔想再被你mon住。但係我就係冇勇氣… 我知我唔講可能到18歲都仲比佢mon住我。但係我始終冇咁嘅勇氣反抗佢。其實一向同阿媽關係幾好，學校嘅事我好多都有同佢講，佢都知我算係比較願意同父母傾計嘅人。
無奈佢就係好擔心我安全。中一嗰陣堅持要求工人喺屋企附近嘅地鐵站接我放學。要阿爸同啊嫲叫佢唔使咁驚先肯比我自己返屋企。其實阿爸都覺得個跟蹤app冇用，但係佢次次都係用講笑嘅態度嚟講，唔知佢係咪真係咁覺得… 宜家我中三啦，仲係比你日日mon實，我真係好辛苦。同親阿媽講佢就話都係膽心你姐。唔知點解佢成日都覺得呢個世界好多壞人，永遠都當我係三歲細路。
慶幸嘅係佢唔係好反對我同同學出街玩，次次都比。但係喺屋企裝cam真係令我好大壓力。覺得自己好似寵物咁，得閒就比主人望吓。佢去親啊婆度都show個cam嘅畫面比佢睇，呢種感覺我好唔鍾意。佢話個cam係用嚟睇工人，實際上係點大家心知肚明啦。
係，我懦弱，我真係唔夠膽同佢哋鬧交。我好怕見到佢黑面，好怕比佢鬧。我已經平心靜氣咁同佢講過好多次，佢都聽唔入耳。比人監控嘅感覺令我真係透唔到氣。我有無數個夜晚喺枕頭下喊，我都無話你知。今次投稿純粹發泄，或者我注定上半世都要比人監控。多謝大家睇到嚟呢度🙏🙏