#NSS個人
[Guest] 我呢排好辛苦，做每樣野都覺得好對唔住阿爸阿媽
事源係兩個月前，阿爸阿媽喺度傾緊比家用同埋錢嘅問題，我聽到佢哋話呢兩年因為疫情都無去旅行，但反而錢用多咗，以前阿媽啲家用過完一個月都會有剩，但而家每個月差唔多用晒咁滯，我個陣就係度諗會唔會係我嘅問題，因為呢一至半年左右我轉左間學費比較貴嘅補習社，多咗兩樣課外活動。
個日開始我就無時無刻都諗緊呢個問題，我覺得自己去咗補習但係成績嘅進步上升咗唔係太多，比起其他同我一齊補習嘅同學成績仲有一段距離，我就覺得好內疚，可能我性格比較內向所以我平時都比較少問問題。另外我補習社都會有教一啲讀書方法，但有一啲我覺得對我來講唔係太work，所以我本身都冇跟，但而家我覺得唔用就好內疚，我覺得我令阿爸阿媽蝕錢。
而呢種內疚感只係越嚟越嚴重，我有追星，平時去cd舖我都會忍唔住買一隻專輯，但而家就算佢哋話送俾我，或者我可以用自己零用錢或者利是錢買我都唔想要，因為我覺得我成績同各方面都冇進步唔應該收禮物，同埋如果我用自己錢買就等於浪費左佢哋啲錢。
而家我會用唔同方法想減少我嘅內疚感，我比平時專心咗上堂，補習多咗答問題，多咗好多時間溫書，放多咗時間係練習個啲課外活動，無再買嘢，我仲會幫阿媽做家務，一齊買餸，甚至我會襯佢哋唔覺意放啲錢落佢哋銀包，入啲錢落佢哋Alipay，再攞佢哋電話刪除收款紀錄，但呢啲方法根本行唔到，就算我溫緊書我都會覺得好內疚，諗起佢哋話家用唔夠洗，或者我煲吓劇做吓平時鍾意做嘅嘢都仲係覺得好辛苦，甚至我覺得我唔可以娛樂，空閒時間應該攞嚟讀書，唔係嘅話我就會我就會辜負咗佢哋比我嘅栽培。
我可以點做？我知可能誇張咗，那呢啲嘢全部都係我而家經歷緊，我日日個心銀住銀住好唔舒服，又瞓唔着，今朝仲因為呢件事五點幾就扎醒咗，大家可唔可以俾啲意見我，我應該點樣做，唔該晒大家🙏🏻