麻煩admin po IG Pls(｡•̀ᴗ-)✧多謝嗮
（長文慎入！）
想問下各位對宜家個讀書環境同埋自己嘅人生有乜睇法。
我今年中六，但系發覺自己好似已經失去前進嘅動力。每一日不斷地做卷、默書同小測，不斷重複咁去做緊同一樣野，其實我真係好攰。
可能會有人話，你宜家覺得攰覺得頹，系因為你未有想努力達成嘅目標姐。咁我可以好清晰咁同你講，我曾經系有過一個好普通好簡單個目標——可以以研究歷史作為自己餘生嘅興趣。
然而去到宜家，我覺得曾經嘅我真係太過天真，甚至系有啲低能。我當初因為中意歷史，對歷史有興趣，最後選擇左歷史作為我個選修科。但系我系呢三年裡面只發現自己嘅興趣被消磨殆盡，寫出自己所知嘅史實，會被老師話：“你寫得唔系錯，但系唔系考評局要嘅答案”；表達自己對歷史事件嘅睇法，會被老師話：“有自己嘅睇法系好事，但系你要跟翻考評局想你寫嘅野去作”；想要同同學一起傾下唔同歷史上啲人物嘅八卦，老師會話：“你地講呢啲考試又唔考，不如快啲做卷啦！”
個一刻我就會開始諗，究竟我讀歷史系為左考試同考評局，定系自己個興趣呢？
唔單止系咁，除左開始思考自己究竟係咪仲真係可以達到自己個目標之餘，我對自己個未來都好迷茫。2021年，武肺依舊繼續爆，到時候考唔考到DSE都未知。如果考唔到，我係咪就咁就業，去搵份工庸庸碌碌就咁一世？但系如果繼續讀書，我讀完出來又點？欠住啲學貸，跟住四圍求職不果最後要靠老豆老母養翻自己？呢啲都唔系我想做嘅事，但系呢個社會早已經有一套固定嘅運行規則，我地所有人都只不過系流水線上嘅一件貨品，跟住條生產線去行。由出世個一刻已經被許下無法負擔嘅期望，最後在旁人失望嘅目光中麻木咁度過餘生。
讀書，考試，工作。人類根本就唔應該自己畫地為勞。讀書唔系為考試，考試唔系為工作。學習本來就應該同教科書上嘅陳述一樣，系快樂嘅，系令人可以沉浸其中嘅。而唔系為左考好試，揾好工嘅一個途徑。
坦白講，我曾經有過自殺嘅念頭，更曾經寫下一封遺書交比我老豆，同佢話我隨時會死，會冇辦法負起養老嘅責任。但系每次一打開窗，一攞出啲藥，我又會開始諗起我老豆個副好失望嘅樣，我真係冇咁嘅勇氣去了結自己，都唔想令我老豆真係孤獨咁度過晚年。所以我開始積極咁去進行心理治療，去嘗試坦然面對呢個仆街到唔可以更仆街嘅世界。
大家有冇同我一樣嘅感覺？覺得自己系考試機器，系一個被人困系牢籠裡面嘅困獸，想要掙扎但系冇任何辦法？我相信我決定唔系第一個咁樣諗嘅人，但系我唔想以後再有人會咁樣諗。希望2021年真係可以有一個好開始。
多謝admin(◡ ω ◡)