Reply NSS210103I
請唔好因為抑鬱症而自責。
每個人可以同一時間處理或者承受嘅嘢都唔同。唔同人會因為唔同嘢而變得抑鬱，無辦法一概而論。我嘅淺見係：除咗有部份原因係而家呢個社會環境都幾灰下之外，你會抑鬱可能亦都係因為你十分擔心屋企人嘅狀況。當然，亦有機會係同其他因素有關。喺冇一個更全面嘅了解之下，實在好難同你講到點解你會抑鬱。
不過，請你千祈千祈唔好因為你有抑鬱而自責。你問到，點解你會hold唔到呢？我相信係因為對你嚟講，呢排實在有太多嘢要諗，太多嘢要處理喇。無論個原因係咩，都唔好覺得完全係你嘅錯。呢個係一個正常嘅心理反應。係人都會有一個界限，如果啲情緒、壓力等等越來越多，過咗呢個limit，咁咪會breakdown。
我明白你話，同唔到身邊嘅人講，唔想佢哋擔心自己嘅同時，更加要去擔心你。小弟係過來人，試過因為自己太負面，唔想煩到其他人而收收埋埋自己嘅情緒。但係其實咁樣做係好唔健康嘅，甚至好有機會會因為積壓喺度嘅情緒一直冇機會釋放，而令到自己更加抑鬱，最後爆煲。所以，唔好因為唔想搞到其他人呢個原因而壓抑自己想講嘅嘢。接受自己有需要同其他人講嘢，訴苦呢個事實先。
希望你搵到一啲你信得過嘅朋友，同佢哋一齊傾下計，散吓心。到時候，你自自然然就會搵到機會，同佢哋講下自己嘅煩惱，同埋心入面想講但係又唔識講嘅嘢。當然，如果你信得過一個喺網絡上面三唔識七嘅人，都可以搵我講吓嘢嘅，我相信作為一個都係（幾）有抑鬱嘅人，我都可以比到少少insight。總之，如果你發現自己有好多嘢諗，好多嘢想講，不妨搵啲方法釋放一下。
祝願大家喺呢個動盪嘅時節入面都能夠搵到一條支柱，繼續生存落去。共勉之。
Sorry for 1999。