最近見到好多小朋友話驚自己有抑鬱？憂鬱之類，喺睇到個啲post同comment之後我想比啲意見同分享我嘅經歷同感受。
我係一個已確診抑鬱症同焦慮症嘅20歲女，喺幾個月前出國讀書，喺疫情下，我發現自己嘅病嚴重咗。
我喺中五六呢兩年入面因為學業、社交、社會時件同一啲欺凌事件嘅發生，令我由本來有抑鬱徵狀、上網做抑鬱測試好高分之類，到一起身就失去控制咁大喊、食量大減、體重跌咗十幾公斤。之後因為我長期唔返學，我媽媽終於帶我去睇醫生同確診抑鬱同焦慮，其後當然要keep住食藥同複診。
喺上年二月開始，疫情越嚟越嚴重，診所亦因此無開，我就攞定咗好幾個月嘅藥。食咗藥好幾個月嘅我，之後都有返翻學，同學都覺得食咗藥嘅我好奇怪，由以前成日笑口細細、嘈喧巴閉，到一粒聲都唔出、做乜都無反應，個陣時對我嚟講，笑已經唔係我開心嘅表達方式，只係面對其他人嘅工具。
我係喺疫情期間出國嘅，喺嚟之前我已經有個拍拖兩年幾嘅男朋友，仲喺香港嘅時候我嘅病情已經好咗好多，當然仲係會時不時爆喊同好多負面諗法跑出嚟，不過喺同朋友嘅相聚同傾訴下都可以適當咁發洩出嚟。而我而家身在異鄉，加上啱啱嚟到要隔離好耐，因為隔離完返學有同學確診而再次隔離，令我少咗好多好多嘅社交，亦因為LongD嘅緣故，我同男朋友都成日鬧交，令我壓力倍增。嚟緊一年入面可以返香港嘅機會真係微乎其微，一直睇唔到返香港嘅一日令我覺得好迷惘，所以呢排我又開始爆喊，有時候仲會蠢到同自己講我已經好返、已經大個女唔可以再喊而抑壓落去，請大家唔好學我！
至於點解唔食藥呢？係我蠢，我覺得自己已經好得七七八八，加上唔想再比藥嘅副作用搞到個人無曬感情，所以我無帶藥出國，諗住自己會無事，就變成而家咁，病情又嚴重返。
喺之前嘅post入面，各位都會話自己成日好唔開心、會想喊，請你明白唔開心同喊都係正常人嘅情緒反應，當然你可以控制同抑壓佢哋，但係只會令你更辛苦同更唔開心，所以適當地發洩佢哋係正常㗎，千祈唔好比自己覺得唔應該、好羞恥之類。如果你哋真係好擔心自己有情緒病，真係考慮下睇醫生，接受適當嘅治療。
而我覺得同朋友分享都未嘗唔係壞事，但請記得，唔係所有人都會理解你嘅行為同煩惱，所以先三思再搵人陪你傾訴。之不過，同朋友、社工傾訴嘅效果真係遠遠唔及睇醫生，所以真係頂唔順，一定要睇醫生，雖然好貴，但係可以搵到合適嘅方法去解決呢啲問題，點都係值得。
最後，好對唔住，呢篇文好長，而且我中文差咗，可能會打錯字，希望大家見諒。DSE嘅同學要加油，仲有兩個月就開考，要盡力，唔好比自己後悔之餘唔好太chur，小心身體。
疫情下，香港人，加油，小心身體！