小妹今年f.2,13歲。長文,sor for 1999
我嫲嫲今日有啲唔舒服,打咗電話俾我老豆,我老豆就叫咗我去嫲嫲屋企睇吓佢有冇事。
我去到嫲嫲屋企,嫲嫲話佢冇事,我因為唔太放心就坐多陣。
之後,我大伯伯(我老豆個啊哥)同佢條女嚟咗,我見有大人嚟就唸住返屋企,點知我大伯伯就行嚟我前面寒暄咗幾句,又拍下我個頭話我高咗,佢條女就直接抆開我個口罩話睇吓我個樣,兩個牛高馬大嘅人一齊掃視我,令我覺得有少少唔舒服,但礙於佢哋係我長輩,我就冇講乜嘢。
我同我大伯伯講話既然佢哋嚟咗,咁我就返屋企先,我大伯伯就叫我坐低飲杯茶先走,我咪搵張櫈坐低,點知我大伯伯突然之間喺我前面踎低咗,目光停留喺我兩隻腳之間(我著裙,啱啱好過膝),仲要對住我笑,我嗰吓真係好唔舒服,好想喊,係佢條女問佢做乜,佢先行開咗,去咗洗手間,我趁佢去洗手間嘅時候,即刻同嫲嫲講話有嘢做要走先。
我一離開咗嫲嫲屋企嘅時候,我就即刻大喊咗出嚟,我真係唔知可以點。
我唔可以同我媽咪講,因為我媽咪同我老豆本身關係好差,差到一見面就鬧交,如果我同咗佢講,佢一定同我老豆有排鬧,我唔想佢哋兩個再嗌交。
我亦都唔可以同我老豆講,因為我老豆唔會信我,佢會話我小題大做。我平時都好少去嫲嫲屋企,因為我其中一個伯伯(我老豆有三個哥哥)就係同我嫲嫲一齊住。我老豆就成日鬧我唔去嫲嫲屋企,成日話我點解咁黑心咁唔孝順,我有同佢講過我唔鍾意見到嗰啲伯伯,佢即刻一巴煎咗我度…所以,同我老豆講係冇可能㗎喇。
其實我一直都唔係好鍾意我老豆嗰邊啲屋企人(我老豆啲兄弟姊妹),佢哋成日都會無啦啦講粗口,又會問大耳窿借錢(地址仲要寫我嫲嫲屋企)我大伯伯之前仲鬧我媽咪係雞,話我媽咪同我老豆一齊係貪佢啲錢。
我老豆之後一定會叫我再去嫲嫲屋企,但係我真係唔想再見到啲伯伯,我可以點算…
投稿時間:23-1-2021,10：22 a.m.