［長文慎入］（我同佢都係女）
我鍾意咗佢，但係佢冇可能接受我。
佢唔係一個好靚嘅女仔，都有啲肥，但係我覺得佢就好似一個小朋友咁，好可愛。我係一個幾內向嘅人，平時小息多數都坐喺自己位度瞓覺或者做功課，佢同我唔同班，但係成日都會走過嚟坐喺我隔離同我傾計，拉我一齊去廁所。有其中一科我係同佢一齊上，每次上堂佢都會係咁同我講嘢，佢仲會話咩好掛住我，唔想落堂，有時仲會捉住我隻手。落堂嗰陣又逼我同佢講byebye，我hea佢佢會話byebye邊個，然後要我講多次。佢份人好好同時又有啲蠢，我好鍾意話佢蠢好豬，得閒整蠱吓佢。
漸漸我發現自己鍾意咗佢，我每一日返學都好期待見倒佢，如果嗰日有嗰科嘅堂，我會好希望快啲到，冇嘅話會好唔開心，希望佢小息會嚟搵我。見到佢同其他人傾計玩得好開心，同其他人出街，我會好妒忌，但我邊個都唔係，無資格呷醋。
佢有時會whatsapp問我有關於功課嘅嘢，我答完之後會專登搵嘢講希望可以傾多幾句。我喺ig po story話唔開心嗰陣，佢會reply然後開解我聽我呻，令我開心返。
佢不時都會話我好可愛，之前我有一科考第一佢又讚我好叻，我唔開心，佢會話你咁樣搞到我都唔開心，我有好消息嗰陣，佢仲high過我。
前排好凍，我上堂嗰陣笠住頂帽，喺我寫緊notes嗰陣頂帽就嚟甩，佢見到之後幫我笠返好，然後扮無事繼續寫notes，我就偷偷地擰過去望住佢笑。
有一次佢被人誤會所以好唔開心咁跑走，然後咁啱見到我就衝咗過嚟攬住我，嗰一刻我好想世界停止，咁我可以永遠攬住佢，之後佢同我講返話我比佢嘅擁抱好溫暖。
之但係我知道我同佢係無可能，佢只係當我係一個好好好嘅朋友。之前佢聽講佢嘅一個friend鍾意我哋班嘅唔知邊個（兩個都係女），佢同我講話覺得好恐怖，所以我知道佢唔會接受到同性戀。我問過佢理想型係點，我原本想話可以考慮吓我，最後只係答佢哦。我有諗過無數次同佢表白，最後都打消咗呢個諗法，因為我好驚佢會遠離我，佢對我嚟講好重要，亦都好驚佢會話比其他人知，比其他人討論。