#NSS個人
[GUEST] 我今年中五，係一個好內向嘅女仔。唔多朋友，好少參加課外活動，有社交障礙之餘仲有輕微抑鬱。
點解？我諗係因為我塊面有好大達嘅胎記，唔比人笑已經要多謝主。
我一生都係得自己一個，間唔中比人杯葛下，都麻木晒。
啲人成日話自己一個最快樂，但係始終都有啲孤單。
尤其係係你最落魄、唔開心嘅時候想搵個人傾訴，先發現自己一直以黎都係自己一個。
但係我識左呢個師姐，佢今年中六。
佢好外向，好多朋友，報好多唔同活動，成績好好又十項全能，琴棋書畫樣樣精通。同我比起簡直天與地嘅分別。佢亦都係學校啲輔導員黎。
有日社工唔知係咪見我太寂寞，跟住叫佢過黎搵我傾下計。
我本身諗住佢係個啲自來熟嘅人，但係佢反而一步一步黎，冇一黎就搭膊頭稱兄道弟，反而好溫柔咁問我平時鍾意做咩，得閒講下啲無傷大雅嘅笑話。
佢有次見到我手臂啲疤痕，佢冇出聲，就咁攞起我手臂，然後望住我，好溫柔咁話：「以後唔好啦。有咩唔開心要同我講。睇下，花曬啦。」我個下真係忍得好辛苦，唔想係佢面前喊。
其實最重要係，佢一直都係望住我講野。可能你會覺得好正常姐，事實係一直以黎好多人同我講野都係迴避緊我塊面，好似望到就會傳染咁。但係佢冇，佢一直望住我講野，好似我塊面同正常人一樣咁。
就係咁，佢每個禮拜都黎搵我傾計，後尾佢仲fol埋我ig，間唔中得閒都會撩我傾計。
呢段時間，我真係好開心，我終於識到個朋友，一個尊重我嘅人。
雖然佢真係好多好多朋友，但係佢從來都冇冷落過我，我只要同佢講野佢係5分鐘之內就會覆到咁濟。有時仲會落黎送嘢比我，有野食有野飲。佢送比我個陣全班都會靜曬望住我同佢，但係佢完佢冇care過其他人嘅目光。
被重視，被愛，除左我屋企人之外我就冇感受過。
呢段時間佢真係比左好多，好多嘢我，唔係講物質上，係精神上有左依靠。好似一直以黎都係深淵度，佢就帶住光明咁入黎。
佢同我講：「胎記姐，我覺得好型喎！就係因為每個人唔同，做人先有意義㗎嘛。」呢句可能好普通，但係對於比人由細歧視到大嘅人黎講真係好難能可貴。
亦都因為咁，我笑多左，啲同學都冇再咁抗拒我，會主動問我功課，問下其他野。雖然都係蜻蜓點水，但都叫做有個好開始。連之前杯葛我嘅人都突然間唔出聲，冇再po過我嘅改圖上ig，連之前嘅改圖acc都刪左。甚至有啲小學同學都突然同我講對唔住，好後悔自己之前點點點。
我好清楚佢有一日會走，而我對佢黎講可能只係另一個client。
但係我都好想係度同佢講，多謝你。
如果冇你，我可能已經唔係呢個世界度。
圖Link: