#NSS學校
[GUEST] Hello👋🏻我依家係一個中四嘅學生,即2023dser。
大家都知道2024年考dse同2023考嘅內容同範圍完全唔一樣,我個人亦prefer 2023年嘅制度多d。
但令我煩惱嘅係我覺得自己揀錯科,所以想下年轉校兼重讀中四。
老實講依家讀緊間學校完全唔差,每年十幾個人競爭一個位,雖然唔算係傳統名校,但都可以話係有少少名氣嘅地區名校。呢度嘅老師、同學都唔差,雖然唔係啲咩風雲人物,但我亦都冇畀人排擠,又有兩三個知心好朋友。我理應要幸福、理應要滿足,但我讀咗兩三年之後,發現自己唔係咁適合。呢度每個同學都好緊張自己嘅成績,甚至我覺得佢哋有d過度緊張,學校亦都將成績放喺第一位。係呢間學校我好睇唔起自己,因為身邊永遠都有更叻嘅人。我好清楚自己追求嘅唔係成績,第日亦都唔係想入啲咩一流大學,所以先會萌生轉校嘅諗法。
我想轉去一間band 2直資嘅英中,佢主打自己係一間比較國際化嘅學校。雖然唔知轉過去之後情況會唔會有所改變,但我相信應該唔會變得更差。我自己都清楚中四轉過去可能會比較難融入,入大學嘅機會率亦都會低咗。真係覺得好崩潰,唔知自己咁樣諗法實唔實際,應該追求自己想要嘅,定係留喺依家呢間學校讀一啲自己唔鍾意又唔擅長嘅科目,混混噩噩咁考完dse。
其實目前未有任何決定,因為我好迷惘,個腦袋好混亂,唔知自己應該做咩,亦唔知道自己生存喺呢個世界上有啲咩價值。同屋企人有稍為傾過轉校呢個話題,佢哋話如果我想試嘅話就算直資佢哋都冇問題。屋企經濟算係小康,暫時都安穩,但我真係唔捨得轉去國際學校,叫父母畀幾十萬供我讀兩三年中學,我亦都冇信心自己適應到。
其實如果個學制無改變,我應該會毫不猶豫咁即刻去面試,無論得定唔得都會嘗試下先。因為我係依家啲學校讀咗幾年之後,考試前焦慮嘅情況越來越嚴重,又毫無讀書嘅動力,雖然唔知係呢間學校嘅環境令到我變咗定係只係單純係我嘅問題,但我好想轉一個環境重新開始。
多謝大家睇到呢到,如果大家有咩意見、想鬧醒我、講下你會轉校留級定係留喺原校讀或者分享下如果你面對呢個情況你會點樣做,都可以喺下面comment,我會去睇㗎。
Have a good day 🍀
圖Link: