#NSS個人
[GUEST] 小妹今年F2，呢啲嘢唔知同邊個講，所以先喺度投稿，純粹想發洩情緒，希望大家唔好介意。(長文）（表達能力唔係咁好，唔好意思）
我份人超級怕生，每次要人哋主動同我講嘢，連諗點回答都會超級緊張，但係非常慶幸識到一班fd，就開始咗好開心嘅中學生活，亦都好快適應到。不過好快就開始停課，就開始少搵佢哋。（順便一提，小學fd都淨係keep到一兩個，都好少聯絡，所以除咗Hi bye fd，10隻手指可以數得晒我所有fd。）
上年F1停課嘅時候，嗰半年超少搵fd（係因為好驚佢哋嫌我煩，幾熟都好，我都好少主動搵人，同埋我成日講嘢，佢哋都會已讀晒我，所以我唔敢搵人），根本冇點同人交流過，變得更加怕人，變得孤僻咗。雖然佢哋都話當我好fd，但係我都超級冇安全感，覺得佢哋只不過都真係當我係過客，下年就已經唔會再fd。
升到F2，我啲學業好快跟得返，成績都尚算可以，不過喺今年呢班識唔到啲咩fd，同F1啲fd仲有來往，但係冇咩進展，都唔多傾偈。
返學嘅時候都會好開心，因為可以同fd相處，唔使自己一個，但係每次返屋企之後，特別係夜晚，情緒就會唔知咩事，成日諗好多，例如：「其實係咪個個都唔鐘意我，包括父母，啲人成日都嫌棄我，明明喺朋友面前我都唔會展露唔開心嘅一面，點解佢哋成日都唔係好理我，明明我咁在乎佢哋，點解佢哋好似完全唔care我，如果我死咗，啲人係咪就會關心我？佢哋就會後悔唔珍惜我？啊，唔好，可能而家死咗佢哋都唔會有feel，唔好死住..我人生唔可以就剩係得咁樣，唔可以令父母傷心，我相信未來應該變好？..」
相信大家睇到呢度都覺得我係一個好無聊、好低能、好自私嘅人，但係其實我都唔知點解，明明我都冇遇到啲咩挫折，但係最近差唔多日日都諗埋呢啲嘢，情緒都超級唔穩定，唔開心永遠都唔會同人講，仲成日擔心未來，自己又冇咩特長同興趣，成績又麻麻地，會唔會讀唔到好嘅科，會唔會冇工要我，會唔會變成露宿者，出街會唔會俾車撞死，會唔會孤獨終老等等。
有時都覺得自己可能有情緒病，但係真係唔想睇醫生，好驚自己真係有病，阿媽一定好傷心，朋友會嫌棄我，同埋而家好多人都唔鍾意啲有情緒病，覺得呢啲人都只不過係扮嘢，博同情。但係我維持左呢個現象已經差唔多一年，好攰，情緒成日控制唔到，明明唔想喊，都可能無啦啦冇原因咁爆淚，想快啲冇事。
成日都好無助，唔開心唔知可以搵邊個，所以就將啲嘢寫晒喺度，而家心情好返啲。多謝亦都對唔住睇到呢度嘅你，多謝你咁有耐心睇到呢度，對唔住吸收左咁多負能量，同埋睇咗一篇九唔搭八嘅文。希望在座所有人，都可以開開心心咁生活。
Sorry for 1999