#NSS社會
[Guest] 下文會有啲1999，但係都希望大家可以包容下，都希望大家可以分享下自己嘅睇法，等我都學下嘢。
我冇諗過呢世人會放自己嘅阿爸阿媽喺個咁大嘅平台到講，但係短短一分鐘嘅對話已經令我見到好多社會嘅缺陷。今日我提到話我有位同學有情緒病，考唔到dse，之前有自殘嘅行為，再温應該搞唔掂。佢哋話：「考試先嚟情緒病呀？」「我都有情緒病啦，我想中六合彩呀。」佢哋係真係冇顯露過一絲關心。從佢哋嘅言論係睇得出佢哋係好不屑，我完全理解唔到佢哋係點諗，應該係覺得我嘅同學借啲意逃避dse，或者係佢好軟弱。
佢哋對情緒病嘅認知錯得離譜唔再講，呢個係我父母冇與時並進，關注社會嘅責任，我相信睇緊呢篇文嘅大家都好關注周遭發生嘅事。我想強調佢哋冇同理心呢一點。
我冇患上過任何情緒病，十分幸運，所以我唔知有情緒病嘅經歷係點。但係同理心真係好基本嘅嘢嚟，我好希望大家可以展現下自己嘅同理心。我唔寄望大家可以主動關心人哋，我只係希望大家唔好睇唔起其他人。唔通考第一嘅人會睇唔起考第尾嘅人？跑第一又睇唔起第尾？能力高嘅人都冇資格睇低任何人。同時喺人哋失落嗰陣都唔好冷嘲熱諷，本來人哋生存在世冇必要承受呢啲嘢。
雖然對於上一代嚟講，現時好多概念都好複雜。性別係色譜，唔再係二分法。人追求嘅夢想同自由，唔再係生存必要嘅物資。好多好多人，一生默默耕耘，過咗半世人，發現社會唔再係自己諗嘅咁樣，令社會衍生好多問題，佢哋可能都等緊人幫佢哋融入返呢個社會。
最後，希望大家可以做到以下幾樣嘢。
1. 唔好到自己親身經歷痛苦後，先知人哋痛苦。
2. 比上一輩世界已經好唔同，唔係好似以前咁。
3. 自己都要關注多啲社會嘅嘢。
4. 愛自己！咁先可以愛人。
5. 祝你在亂流下平安