#NSS家庭
[GUEST] 小妹form 3，但好多嘢或者選擇都係阿媽幫我做，但其實唔係我唔想揀囉。
去買衫，啲衫全部都係阿媽揀，次次都揀埋啲pastel顏色印晒獨角獸寫住Princess嗰啲。但我一話唔係幾鍾意，佢就會話我「反叛期」、態度唔好、黑我面等等，係間舖頭度大聲話我，真係刷新我對反叛期嘅認知。
所以我宜家每次唔鍾意都係已經唔想望件衫🙂，就咁講「無所謂啦」「你鍾意啦」，當然買完番嚟我都唔想著。於是嗰啲衫就塞喺衣櫃冇郁過啦，或者淨係著過一兩次(仲要係阿媽要我著我先著)。次次著都要著翻件褸係面，佢仲問我咁熱著乜褸。
或者有時佢會「畀我揀」，我揀完佢就話「呢件咁核突」就揀番佢鍾意嗰啲。其實我對著衫冇乜要求，但係佢次次都整到我聖誕樹咁我真係……
甚至乎連食飯都係！我想嗌我鍾意食嘅嘢或者食下新嘢，佢就話「呢樣嘢你唔會鍾意食㗎」「呢樣嘢好食啲」，但其實係佢唔鍾意囉，完全否定晒我啲選擇。😅
就因為咁所以我就由佢，成日都話「你揀啦」「求其啦」。結果佢宜家話「你咁大個人仲要我幫你揀！」，簡直就係自相矛盾嘅最佳示範。我根本唔知點好，原來我係「反叛期」。好想知有冇人嘅阿媽都係咁。