#NSS學校
[某出名讀書嘅學校] 希望admin po IG thanks
文筆唔好請見諒
我今年中三，有個幾好嘅朋友，因為今年同班先識，機緣巧合下分同一組做project熟絡咗。某日唔知做咩同佢WS傾咗幾個鐘計（交心嗰種），自此之後佢時不時都會揾我訴苦放負。
佢同我講佢真係冇其他人可以傾訴所以揾我，我都想幫下佢，佢每次揾我我都會聽佢講，我已經覆得好快但係有時我真係唔知點覆佢好。佢講啲嘢越嚟越負面，每次聽佢放完負我個人都會比佢搞到有啲sad，不過我就冇乜所謂。雖然我知道有更多更慘嘅人，但係我希望大家比下意見我點幫到佢。
佢嘅志向係做醫生（因為以前一場大病比醫生救過），所以讀書都幾勤力，成績都係中上唔算差。但係我覺得佢比太大壓力自己，每次考試前後都係咁貶低自己，成日都話自己太懶唔讀書，又話明明每日都有溫書但係始終比唔上其他人，話自己剩係識打機睇動漫，諸如此類。佢話每次hea或者放鬆都會有罪惡感，每日起身都想重新開始，要改過自新，但係每次都犯同樣嘅錯，總係往錯嘅方向發展，覺得自己好錯好唔應該，但係又改唔到。
佢同我講佢老豆成日將佢同表哥比，佢表哥讀書好好都考唔到醫生，搞到佢好大壓力。佢話佢老豆成日鬧佢，但係都係出於好意，希望佢好好讀書，所以佢而家覺得自己不孝，因為自己比好多人救過，但係就辜負咗佢哋。我覺得佢老豆鬧得有啲過分，佢同我講佢老豆話為咗佢放棄升職機會，跟住點點點點，又話佢而家去自殺得到嘅關注會多過大個做廢人。
佢仲同我講咗好多好多，但係唔想篇嘢太長就唔講啦。我覺得佢有時將自己睇得太重，實在比太多壓力同顧慮同擔憂比自己，雖然我覺得佢唔係啲會做傻事嘅人，但係有啲嘢好難講。希望大家比下意見我點樣幫到佢，減下壓或者開解佢，等佢諗嘢唔好咁負面。雖然當事人唔會點睇IG，但希望你唔好怪我喺度講，我係真心想幫你。勿相認🙏