HGSS

#NSS愛情

[HGSS] 我有一個好朋友 就叫佢B啦
我哋係friend搭friend咁識嘅
我有時有啲懷疑其實究竟我對佢嘅感情係咪超越左正常朋友
首先我想多謝左B先，你令我由一個懵懵懂懂不懂世情嘅小朋友，變成更成熟嘅人。好多謝你同我分享你生活嘅瑣事、煩惱、心事、秘密。從來冇人對我咁好，我自問冇咩真心朋友，所以我亦都唔敢同佢哋講心事。真係好多謝好多謝你。你嘅優點就係我嘅缺點，我嘅缺點就係你嘅優點，我哋真係好夾XD。
講返正題先，B有個男友，都係我朋友。我一開始嗰陣都喺度幫佢哋，真誠地希望佢哋可以一直係一齊。但去到後來，我發現我開始對呢回事有啲厭惡，開始覺得佢男友有啲乞人憎（佢男友冇做任何嘢），我理性都覺得佢冇乜大問題，但係我控制唔到咁開始討厭佢，放大佢嘅缺點。去到依家我甚至好想佢哋分手，見到B提起佢男友我都會有啲心痛，覺得佢配唔起B，佢嘅缺點我全部都冇，亦都俾佢更了解B。我一開頭都唔為意，我以為係純粹我更年期發作。
我亦都發現我對B係特別好，例如其他friend搵我講電話，我都上堂嘅時候就會cut線，但係如果係B嘅話，我就唔肯cut線。人哋WhatsApp我，我要等一排先覆，但B WhatsApp我，我就好想覆，如果覆唔切就會囉囉攣。喺學校嘅時候我淨係想黐住你，即使你男友可能呷醋。為你將睡眠忘記，通宵傾談～
直至前排，我都係以為只係因為B係我最好嘅朋友，我先會咁做。
神奇嘅事嚟啦，有一日呢，B突然間同我講，「其實我鍾意咗你好耐啦」，仲話佢好似鍾意我多過佢男朋友，我當堂嚇一跳然後得啖笑，冇直接拒絕佢，之後都有啲感動。我知道佢係攣㗎，但係佢係我最好朋友，所以我唔會因為呢件事而離開佢。我係一個反應好慢嘅人，跟住過咗幾日，我先發現我其實好似有啲鍾意B。我開始喺度自我懷疑。但同時間我哋間中會互撩，講吓情話，扮吓悲劇男女主角咁樣。B係一個講嘢好直接嘅人，我形容為厚面皮啦，佢好願意講真心話嘅，佢就認佢講嘅情話(e.g., 我好想一直留係你身邊）係佢真實想法。我自問一開始都係半真半假，但係去到後來我都係講真，但係我唔夠膽認我係講真嘅。我淨係夠膽話係半真半假。我知我好淆底，唔敢承認自己可能唔係直嘅。
但之後我就開始不斷想起佢，每次想佢就播一啲情歌。我係識佢之前好少播情歌。依家每次聽到嗰啲「刻在我心底的名字」、「未開始已經結束」⋯我個心就會赤赤痛。同埋我之前成日都同佢有身體接觸（朋友嗰種），但係好似過咗呢件事之後我有種唔同嘅感覺。
但係我知道我哋一齊係冇結果嘅，我唔想為咗我嘅一己私慾，令你失去一個好愛你嘅男友。我知道我冇佢愛你愛得咁深。如果冇咗你，佢係會死㗎。我好希望可以忘記你，我希望時間可以沖淡我對你嘅相思。每次我瞓覺嘅時候，我都幻想自己可以同你係一齊，但每次瞓醒嘅時候，我就會諗返起你係一個有男朋友嘅人，同埋搞基係不為世人所接納，我爸爸講過如果我係基佢會殺咗我。每當我就嚟可以放低呢份情感、重新振作嘅時候，你又過嚟勾起我嘅回憶，又喺度求我接受你嘅愛。我都只可以溫柔咁同你講唔好咁啦，你唔好愛我啦。有啲嘢係唔講得㗎，我都係為你好，我唔想你受苦，你明唔明其實我真係好愛你㗎，但係我嘅理性話俾我知咁係唔可以咁做㗎。我好想你放棄我，但係我又想你愛我。我真係好煎熬、好矛盾。
你成日都以為你係嗰個追求者，然後我係唔愛你嗰個，你同我講你想以朋友嘅身份永遠守護我，其實呢句應該係我講，我希望可以以難過一陣嚟成全你嘅未來，我希望你嘅男朋友可以愛你一生一世。我對你嘅愛只可以藏在塵封的位置，要不是這樣我怎樣過一輩子。
B，你可能冇follow呢個page，但係我想同你講，我係永遠唔會離開你㗎，我希望我哋可以做一世嘅朋友，呢份心意我只可以咁樣報答你。我想對你講嘅嘢都係晒「未開始已經結束」。好多謝你教識我愛情大概係啲乜嘢。你成日覺得自己冇乜優點，但係我好多謝你教識我咁多嘢，學識點樣放手。就算你之後唔愛我，我都希望你唔好拋棄我，繼續做我嘅知心好友。

圖Link: https://ibb.co/nc8H9pb