#NSS愛情
[GUEST] 第一次投稿，文筆唔好，如果表達得唔好請細力啲屌。
我今年f.5，生理性別係女，
但我唔想叫自己做小妹，因為我從來都冇承認過自己係女。
從第一次對人有好感嗰陣(小學)，我已經發現自己鍾意女仔，
唔係嗰種女仔對女仔嘅鍾意，而係作為一個男仔對女仔嘅鍾意，
咁講好似有啲亂，但我從來都冇當過自己係一個女仔，
所以我覺得自己鍾意女仔係一件好正常嘅事，
但好快我就發現，原來我係人哋嘅眼中一啲都唔正常。
我本身個人好內向，由細到大都唔係點講嘢，
自然我嘅鍾意都係收收埋埋，好彩，真係好彩我有收埋
我清晰咁記得，第一次同frd出街，偶然見到兩個男人親密咗少少，
佢哋就偷偷地笑佢哋，係背後議論、揣測佢哋嘅關係，
從此之後，我收埋咗想同其他人分享我係一個特別嘅人嘅呢件事，
因為我知道呢個社會接納唔到我。
但我仍然總會鍾意人，而且因為係同性，
每一次鍾意，都好似酷刑咁。
唔可以講出嚟，連眼神都要收收埋埋，偷望到一眼已經係奢侈，
明明鍾意，但當對方同我親密少少，我已經想彈開，
因為唔想人哋用奇怪嘅目光去看待佢，
唔想俾佢知道 有一個咁嘅人鍾意緊佢，
驚佢比人歧視，
真係好驚。
上咗中學，去到高form，
呢個世界似乎對我呢種人多咗少少包容，
雖然可能係嗰啲BL/GL戲入面兩個主角青靚白淨嘅形象吸引左佢哋，
如果佢哋見到兩個蓬頭垢面、滿面皺紋、頂住個啤酒肚嘅兩個阿叔做返一樣嘅嘢，
唔知又有幾多個人選擇到包容呢？
至少我身邊係一個都冇。
唔小心扯遠咗，回到正題，
鍾意咗一個女仔，同佢關係都唔錯，
間唔中會單獨傾吓計出下街。
我已經再都冇諗過要表白要拍拖呢啲荒謬嘅嘢，
我連俾佢知我係一個咁嘅人都唔敢，
因為有次親耳聽到佢話同性戀好嘔心，
接受到人哋係接受唔到自己係，
唔係講笑，果下聽到個心真係好痛，
連唞氣都覺得好痛，仲要笑笑口咁和應佢，
真係好驚有一日如果佢知咗，會點睇我？
會唔會覺得我好核突？會唔會覺得我係變態？
近排返返學，仲要同佢日對夜對，我連直視佢都唔敢，
好驚佢會發現我望住佢嘅眼神同望住其他人唔同，
好驚佢會以為我同佢嘅親近只係因為我對佢有非分之想，
真係好驚。
多謝你睇到呢度，我好似寫得太多廢話，唔好意思，
寫咁多出嚟都唔係為咗想要咩意見，只係有啲想講，就講咗出嚟，文筆真心唔好，睇返上面我都覺得自己講嘅嘢有啲雜亂無章。我唔求咩呢個世界對我呢啲人多啲包容，只係希望有一日，寫呢種野嘅時候唔洗再分呢種人嗰種人，不過應該冇可能。