#NSS學校
[[ GUEST ]] 「欺凌」呢兩個字，對於冇經歷過被人欺凌嘅人嚟講，可能你地唔會明被欺凌者嘅陰影有幾大。 但如果你哋好似我咁，曾經比人欺凌過， 你就自然會明白被欺凌者嘅感受……
我依家已經係大學year 1，但我對於自己小學六年級俾人bully嘅事仍然歷歷在目。 我本身性格比較內向、文靜，同人熟咗先會玩得好癲，所以我學比較少frd，本身小一至小三都有幾個好朋友， 但自從小四分咗班之後就冇再同佢哋一班，要盡量認識下新朋友。但由於我由細到大都係生得比較細粒，我係一個比較矮同比較瘦嘅女仔， 但因為小學五年級女仔都開始發育， 咁有啲女仔會飆高得比較快。 然後佢哋就會笑我係「 侏儒 」， 平時分組做project嘅時候， 佢哋會周圍同人講: 「 XXX 係侏儒嚟㗎，佢咁蠢應該乜都唔識做， 你哋唔好同佢一組啦！」
然後上堂嘅時候有時老師叫我幫手擦黑板嘅時候， 啲同學就會笑我:「XXX 咁矮，點擦呀，佢瘦到成支柴咁，都唔知佢阿媽有冇比飯佢食！」 基本上我做乜嘢佢哋都睇我唔順眼。
又有一次， 由於我屋企發生咗啲事，所以我遲咗少少返到學校，但我一返到去嘅時候，發現自己張枱個櫃桶全部都係鼻涕紙， 啲同學見到就同我講:「 嘩，你係女仔嚟㗎喎，乜你咁污糟㗎！」 但重點係啲鼻涕紙真係唔係我嘅， 肯定係有人趁我唔喺度嘅時候塞入我櫃桶。自此之後，每次調位都冇人肯同我坐，因為佢哋覺得我好污糟、好邋遢。
最過份嘅係，有一次， 佢哋趁我小息唔喺班房嘅時候，將我個位嗰張凳換咗做一張爛嘅凳， 結果我一坐落去嘅時候， 成個人連埋張凳跌咗落地， 然後佢哋就成班女仔圍住我喺度笑。咁可能因為我比較矮， 屎忽跌落地個衝力唔算大，所以肉體上唔算好痛， 但心靈嘅傷害真係好大…… 而且佢哋成日同其他唔識我嘅人講我壞話， 所以我成個小五小六都冇friend， 連畢業禮都係自己一個影相……
直至而家已經讀緊大學，我夜晚瞓覺嘅時候間唔中都仲會夢到嗰幾個欺凌我嘅女仔， 我好記得jupas放榜嘅時候， 我不斷喺度諗，如果將來同佢哋同一間大學，甚至同一科，咁點算？我會唔會又因此而冇曬朋友？ 最後好彩同佢哋唔係讀同一間，因為我有stalk過佢哋ig。
我好想奉勸大家，欺凌人之前，真係要諗清諗楚後果。 你可能會抱住一個玩玩下嘅心態去bully人， 或者你恰完人之後， 你好快會唔記得你自己曾經咁樣對過人。 但對一個被欺凌者嚟講，被欺凌嘅傷害真係好大， 大到你冇辦法想像。 不過我都慶幸自己中學嘅時候識到一班志同道合嘅好朋友，佢哋算係幫我走出咗少少曾經被欺凌嘅陰影， 但小學嘅經歷始終點都冇可能完全忘記， 因為發生咗就係發生咗，返唔到轉頭。