#NSS家庭
[[GUEST]] 長文慎入⚠️‼️
–
–
小妹今年F1，有個大個3歲嘅阿哥。
細個果陣父母已經有嗌交，有陣時嗌得嚴重會講離婚，當然最後都係冇離。
喺小妹四or五年級嘅時候，阿媽搵咗份工返。
之後返咗一年幾就話要換工，換咩工佢冇直接同我同阿哥講。
佢冇返之前果份工之後就成日打扮得好靚出去。
嗰陣我覺得好奇怪，問過佢返咩工，不過佢好婉轉咁唔想答。
嗰陣時我就知道咩料，因為我阿媽講大話個樣真係好容易睇得出。
然後我用我阿媽部手機睇通告嘅時候(果個apps學校話只可以裝喺家長嘅手機)，睇到佢同一個男人有d幾曖昧嘅訊息，仲會講黃色嘅嘢。
果陣時我冇好大反應，因為現實嘅愛情好少會有長久，不過都會唔舒服。
講返份工先，之後我阿媽同個男人一齊搞咗啲生意。(個男人幾有錢，至少有樓。我阿媽唔係為咗錢。)
呢份工都有同我哋講，不過佢係話同朋友一齊搞。
之前仲會日日都返嚟屋企，而家佢會攞份工當藉口，話返唔到屋企。(佢同個男人好似租咗間屋)一個星期先返嚟一兩次，每次返嚟都係同我阿爸都講一兩句嘢，唔會過夜，每次走都匆匆忙忙。(因為個男人喺樓下等緊佢)
個男人都知道我阿媽有老公，之前個男人都有老婆，但係為咗我阿媽離咗婚。
而我阿媽唔離婚嘅原因係為咗我同阿哥，可能係因為驚我同阿哥有陰影。
但係我覺得咁樣仲辛苦，每次來回都匆匆忙忙，仲有試過一個月先返嚟一兩次。
但同時我諗過佢哋如果離咗婚，我同阿哥應該點。
我諗到最好嘅方法就係叫我阿哥跟我阿媽，
我跟阿爸。
因為我驚我阿爸會做傻事(佢係啲發嬲就會掟爛嘢嘅人)，而我阿哥就咩都唔洗諗。
雖然我知道阿媽肯定唔同意我跟阿爸。
呢單嘢已經有兩年。
唔知我阿爸同阿哥知唔知。
我寫咁大篇嘢就係想問我而家應該點做?
因為我應該忍唔到幾耐。
–
–
第一次投稿
中文唔好 細力啲屌
Sor for 1999🙇