#NSS學業
[[GUEST]] 希望admin會抽中我，唔該admin。
小妹而家f.2，但係已經好憂慮揀科嘅嘢。好多人都話理科或者商科出路較廣，或者好多家長都迫自己嘅子女揀理科或者商科，嫌文科嘅出路狹窄，現實社會上簡稱揀文科嘅人嘅出路係乞食。我父母冇話逼我要讀理科或者商科，佢哋話我讀邊科佢哋都會支持我，主要係我有能力同埋讀得開心就ok。
最近小妹好着緊揀科呢方面，好緊張好緊張。可能好多人認為f.2就諗關於揀科係言之尚早，我身邊亦都有好多朋友同埋親戚都同我講，唔好咁擔心呢啲住，升到f.3更加多嘅科目等你去認識 ，等你去了解，f.3先再決定 。我明嘅，f.3先有phy chem bio同埋econ呢4科。我而家先f.2都未曾讀過phy chem bio同埋econ，但係唔知點解我而家唔諗定揀咩科的話，就會成個人周身唔自在，好唔安樂咁。我好焦慮揀科呢樣嘢，我硬係覺得我唔諗定就好冇安全感。然而小妹而家對於揀科或者係自己嘅前途都感到好迷惘。
我而家最鍾意嘅就係中文+中史同埋Hist，我諗我應該係偏係文科。因為小妹擅長背誦，而且對IS呢科冇興趣，數學唔好，上網睇完phy,chem,bio既syllabus完全冇興趣，我諗我應該都係偏係文科人。我比較鍾意了解古代嘅歷史，鍾意欣賞唔同作者嘅文章，有時得閒就睇下啲散文睇下唔同嘅詩詞，會覺得幾有趣 。
不過最近小妹就面臨一個問題，我哋嗰間學校嘅C/D班就係精英班，入C班就一定要揀M1，入D班就一定要揀M2。C/D班除咗係精英班之外，學習風氣比較活躍，教呢兩班嘅老師都教得好好，而且大部分都入到大學，但相反A/B班嘅學習風氣比較唔理想，冇咁活躍，教呢兩班嘅老師大部分都係唔太好，比較參差，同埋呢兩班入大學嘅機率比較微。小妹本身數學底子好差，再加上而家教緊我哋嘅阿sir好廢(佢教數廢係全校公認) ，但係我都算係自作自受嗰種。
基於疫情底下，我懶咗好多，再加上我好憎數學呢一科 ，基本上我每一堂都冇專心聽過老師講嘢。每逢上數學堂，我就喺度同朋友吹水或者睇IG。每次嘅測驗同考試基本上都係裸考。最近考試出咗成績，數學就當然唔合格，但係唔合格得嚟真係好低分，離曬大譜嗰種。雖然我而家f.2，但係我而家連f.1嗰啲數都未搞掂 ，好多好多f.1嘅數都唔識計 ，就因為咁，我好擔心自己一唔到C/D班。我哋學校曾經有老師講過，A/B班入大學率係各班5/29，C班入大學率嘅就係20/29，而D班嘅入大學率就係25/29，但係就一定要揀M1或者M2先可以入到呢兩班精英班。但係而家小妹嘅數學係差到連f.1嘅程度都冇 ….我知我衰，唔聽書，我都有嘗試認真去聽個阿sir講緊啲乜嘢，但係聽完之後都唔明，問佢都冇意思，佢係問非所答嗰種。
小妹第時想揀Hist同文學，但係我哋學校就規定揀文學就冇得揀Hist，揀Hist就冇得揀文學，呢兩科冇得一齊讀，所以淨返落嚟小妹就想揀文學同中史。中史自問成績一般，f.1好憎中史呢一科 ，完全冇聽過書，測驗唔合格，考試唔合格，但係上到f.2，我當中史係故事咁樣睇嘅時候，就愛上咗呢一科。所以我諗第時如果真係要揀我都應該會揀中史或者文學。可以話係我鍾意呢兩科而去揀呢兩科，亦都可以話我冇選擇先揀呢兩科。因為理科我就一定唔會揀，而且商稃我真係冇興趣 ，只得返文科。我哋學校文科分別有Geog,Hist,中史同埋中國文學呢四科。我Geog成績唔好，咁就可以刪除呢個選項，現只係淨返中史，Hist 同埋文學。上面啱啱提及過，揀Hist就唔可以揀文學，揀文學就唔可以揀Hist，所以嚴格嚟講我都只係淨返中史同埋文學。呢兩科唔係話容易，但係我相信勤力係勝過一切，當然有興趣會更加好。
其實自己現階段亦都有擔心過如果揀呢兩科，上到去會唔會搞唔掂，都驚驚哋…但係我覺得如果真係自己鍾意嘅，其實再難，再辛苦，再多嘢背，自己都唔會嫌棄。但係問題就係揀文科同時我就一定要揀M1或者M2，因為我想入到精英班，入精英班最後入大學嘅機會率亦比A/B班大，但係小妹而家嘅數學成績真係不堪入目。屋企經濟上亦唔允許我補習。而家真係好擔心，我有嘗試過去操數，望住本書嘅examples咁樣去自學，去解題，但係做做下做到一半好多好多都唔識嘅時候，就好想放棄，心很累咁樣樣，然後就冇曬動力去做數。
小妹而家真係好驚第時入唔到精英班，疫情底下我已經冇補習，仲要懶咗。呢排我成日都自責自己點解懶咁多。每一份數學功課都係問人抄，都唔嘗試自己做，乜咁樣真係會進步咩？日日喺度咁樣怪責自己，然後嘗試去做，但做做下就好想放棄，基本上每日都係咁樣惡性循環，小妹真係不知所措。第時大個，小妹想做一個中文老師，雖然而家中文成績唔係話非常之好，但係比我預期中都意外地好，我相信成功係靠自己努力返嚟嘅，呢一句說話可以擺喺中文方面，但係就擺唔到喺數學方面，完全見到個堆數已經係暈，唔好話計，淨係見到都想放棄。然後我仲每一題都要用好耐嘅時間，就算可能人哋覺得好簡單嘅題目，我都覺得好難，但係我淨係知道，如果我唔改善我嘅數學，我就可能比較大機率入唔到大學，我都想入一班學習風氣比較好嘅一班，可能競爭壓力比較大，但對我而言，喺呢個環境下，會帶比我更加多嘅動力去好好讀書，努力去攞一個好嘅成績返嚟。在此，小妹想問問大家，我仲有冇任何嘅解決辦法？請問大家有啲咩建議可以畀到我？
除咗驚自己入唔到精英班之外，都好擔心自己中史同埋文學都搞唔掂，始終呢兩科唔係話容易。中史要背熟曬啲史實，掌握答題技巧，而且上到高form冇MC呢樣嘢。而文學就要背28篇範文，要賞析唔同嘅文章，然後有時候就要做比較閱讀，亦都驚自己唔掂，因為我而家中文方面最弱就係文言文，上到去文學都比較多文言文，好驚自己每一次嘅測驗都唔合格，甚至考試成績亦會不堪入目。但係將來我想做一個中文老師，如果冇文學底子的話的確係會差緊啲。請問有冇讀中史或文學嘅人可以在此分享一啲意見？希望大家可以幫幫小妹，最後好多謝你哋睇到嚟呢度，我知呢篇嘢好長，麻煩曬咁多位！