#NSS其他
[Guest] 回覆 #NSS210323B
小妹中學嗰陣讀旅款(不過用中文讀)同埋讀中史。見呢排唔少人都選科，所以想講解下要讀啲咩。
首先，講下上堂學嘅嘢方面，旅款基本上係咩都要讀。由一開始讀就好多theory/terms要讀要記，有啲terms仲要都幾長下。F4開始記就要記旅客類型(colen & plog)、旅遊產品特性、旅遊動機、承載力等等。F5就要讀餐飲業同酒店業，兩者究竟各有咩部門、每個部門要負責啲咩，同埋有咩類型嘅酒店、酒店嘅管理模式同有咩利弊、餐單規劃因素、仲有各類型嘅細菌名等等。讀完呢2本旅遊導論之後就仲有客戶關係及服務(要讀顧客服務五個特點、服務品質差距模式)、讀地理名勝(要記唔同國家嘅首都、有咩特別嘅地標、要識睇地圖)、讀會議、獎勵及展覽業務(要讀咩類型嘅會議、規劃過程)。所以係好多嘢讀好多嘢背，theory要背、terms要記(係一字不漏咁記，因為有啲terms成8至10幾個字)、考試同dse都要apply theory所以都要明。
其次，講下呢科有咩好玩嘅地方。讀就係超級多嘢讀，但係好多outing可以去(不過可能都是乎唔同學校，加埋而家武肺…) 。齋講高中讀旅款呢3年加埋起碼15個outing，而且有唔少outing都去得幾開心，試過出外參觀酒店(我去嗰陣仲有得食自助餐)，試過有沖嘢飲嘅workshop，亦都有遊學團。當然有啲就咁出去聽人講書🤣🤣不過好玩嘅outing居多。即使去outing洗嘅錢都多，但都帶畀我幾多回憶。
最後，就要講下Dse。旅款要求嘅寫字速度都好高(所以要練，一定)，因為dse pp2要用105mins寫3條essay，而且有好多points要寫，一段裏面都要有topic sentence + explanation + examples。而旅款dse pp1 就有MC同資料題，呢份pp個人認為都唔洗寫得咁趕。
總括嚟講，讀旅款都多嘢讀，尤其係當你個旅款老師唔識教嗰陣就更徬徨，唔知點溫好。不過，旅款係一科你一定要擺好多時間去溫去背去理解，而且要操past pp，所以個人認為旅款背嘅嘢個量係僅次於中史(因為小妹中學讀嘅另一科elective係中史)。
希望以上嘅資訊幫到你🙏🙏🙏如果想知關於高中中史嘅話可以睇下一篇。sor for 1999