#NSS家庭
[GUEST] 小妹今年F2，有一個大我6年嘅家姐。
舊年搬咗屋，原本間屋係有三間房嘅，但係阿媽話要令我同家姐增進感情，就將其中一間房變咗做客廳，令到我要同家姐一間房，遇到好多唔方便嘅事。
首先就係間房好細，一個人住算大，但係兩個人住真係好細，擺咗兩張床、兩張書枱同一個細衣櫃之後已經冇位，走路都要側身行。
其次就係我家姐嘅性格好麻煩，成日因為一啲小事就鬧我或者同阿媽告狀，有一次我半夜起身諗住攞部手機睇吓時間，點知俾我家姐睇到，佢就同阿媽講我喺半夜玩手機，搞到我被阿媽收咗兩個星期嘅手機。佢仲會亂咁攞我啲嘢、會偷我啲零食嚟食。
另外就係我同家姐嘅作息時間好唔同，當我訓緊覺嘅時候佢就喺度打機，仲要唔帶耳機，我同佢講咗好多次佢都唔聽。當我溫緊書嘅時候，佢係咁喺我隔離騷擾我，搞到我專心唔到。
最重要嘅一點係當我畫畫嘅時候，佢會喺隔離話我畫得樣衰，令我對自己越嚟越冇信心，只可以趁屋企冇人嘅時候偷偷地畫。
我又比較細膽，唔敢同父母直接講呢件事，想問吓點樣可以間接暗示阿爸阿媽。