#NSS個人
[GUEST(´▽｀)ノ♪] 我同我屋企人相處基本無問題，但係我唔明點解佢哋成日話我蠢。
小妹平時放學見到有啲公公婆婆由我朝早返學賣嘢賣到我放學都仲見到佢地，如果我放學咁啱見到佢哋差一個盆栽就賣完可以收檔嘅話，我通常都會用少少錢買埋返屋企，起碼佢哋可以快啲返屋企。仲有，我屋企樓下成日都有個伯伯坐喺一個小角落賣乾果，我放學經過成日都會幫襯，但如果比我屋企人見到嘅話佢哋就會話咩嘢呢啲嘢咁污糟你都敢買，我唔明點解佢哋講嘢要咁難聽。
我由細細個開始行街經過見到乞兒都覺得佢哋好慘，我問我屋企人可唔可以幫下佢地一定會比人鬧，話我呢啲唔係善良，係蠢，呢啲十個有十一個都係呃人。但係我覺得如果我比咗十個人錢，有一個係真係需要人幫忙，咁已經好夠。
呢啲嘢唔只發生過一次，同佢地行街我見到啲箱可以捐錢嘅我都會將身上有嘅散銀或者啱啱找返嚟嘅錢擺入去，當然啦，佢哋見一次鬧一次，講話有錢點解要送比人，佢哋嘅思維方式真係好奇怪，甚至仲會威脅我唔畀零用錢我，我成日比佢地扣我嘅零用錢，不過我唔會屈服，我先唔似佢哋咁冷血，無論佢哋點鬧我我都會繼續盡我嘅力少少力幫人，雖然我做嘅嘢好微小，但係如果呢個世界個個都有呢個意識嘅話，大家都會開心少少。
可能你地會覺得我肯定係錢多，但係我宜家疫情因為開銷好少，所以屋企人係一蚊都唔會比我，我用嘅錢全部都係疫情之前儲落。疫情之前嘅零用錢每個月都係只有千幾蚊。
我唔覺得我蠢，亦都唔覺得自己善良，只係呢個世界嘅壞人越來越多，我先會顯得「善良」，我真係好希望身邊嘅人都可以有幫人嘅諗法。
打呢篇文純粹發洩吓，同埋想各位知道其實你嘅一個小舉動已經可以幫到人。
我知道我講嘢有啲一舊舊，希望你地睇得明啦，同埋我成日打錯字，大家屌細力啲。admin唔該鋪喺IG(´▽｀)ノ♪