#NSS個人
[Guest] 第一次投稿，唔太清楚算唔算長文，
如果冇寫長文慎入sorry🙇🏻♀️🙇🏻♀️
辛苦admin了
–
小妹今年F4，讀男女校。
上年F3停課前發生左件事，令到我開始好介懷人地嘅諗法。
事情詳情唔詳細講，驚被人認到，總之大概就係我將我畫嘅X圖比一位異性同學睇（其實係附近嘅同學都有睇，只不過有一位異性，冇其他意思，屌細力啲plz），我以為冇乜野，
點知之後我從佢朋友口中得知佢私底下同佢班fd話我發姣。
其實我明白嘅，佢地班人係嗰種把口賤，中意講啲侮辱性詞語去話下人當玩笑話個類人，所以發姣呢啲野佢地都只會係講笑。
但即使已經過左一年幾，我同佢地因為揀科已經分左唔同班，我個腦都一直遺忘唔到呢件事。我變到開始好在意人地嘅眼光，控制唔到嗰種。
舉個例子，我而家夏天變得唔會敢著短褲出街，或者唔願出街。因為我行係街上嘅時候，個腦一直會不受控咁諗：
我隻腳又肥又短又樣衰，啲人一定望過來啦。
我隻腳咁核突，同個短褲點會襯啊。
我行路會唔會唔自然？好恐怖、啲人一定望曬過來。
以上只係部分諗法，其實更多時候出街真係會啲諗法多到亂，
我知道其實係我諗多左，根本唔會有人望我，但我控制唔到自己，一出街就好驚，剩係好想快啲到目的地，或者快啲做完啲野，我更因為咁被屋企人話係懶，被人鬧。
但係我好辛苦，我唔知可以同邊個講，即使講左都唔會被認真對待，因為真係我自己一直亂咁諗野，佢地聽完仲可能會覺得我係自作多情，自己攞來衰，勸都冇用。
除左出街，其實真係仲有好多野我都因為咁唔敢去做。
po IGstory，覆訊息，同唔熟嘅人講野，
好多好多，我都因為太在意人地點諗而唔敢再去做。
復活節假下個禮拜就要完，而我嗰form又好唔好彩地被學校安排左做第一批復課嘅。
一諗起返學又要面對啲唔熟嘅同學，又要著嗰條好顯身材嘅校裙，我就好驚。好驚被人討論我對腳粗，好驚被人討論我個樣左，好驚被人笑我肥左，諸如此類。呢啲諗法而家日日塞滿曬問我個腦，每日不停打機都只係想分散注意力，但我發現，真係唔得。
我想問下大家，有冇人同我一樣有類似嘅狀況？
我曾經Google過我呢種狀況，但我發現Google嘅結果都唔太符合我，我又唔想將件事搞大，我可以點做？
其實就而家寫呢篇文，我都已經改左無數次，因為我好驚我寫錯字會被人屌，我講得唔通順會被人話1999，或者明明係長文但冇寫長文慎入……
總之希望大家可以留言啲意見比我，
我再咁樣落去真係唔係辦法🙇🏻♀️🙇🏻♀️