#NSS家庭
[Guest] 第一次投稿 sor for 1999
小妹今年中二，讀女校，有一個好煩既阿媽。
話說有一日我有個小學同學想約我出嚟食飯，我住中西區，我朋友住喺太古城，就諗住約去太古城，順便去埋佢屋企。我問我阿媽可唔可以去，之後阿媽竟然話去太古城太遠，好危險，話會好嘥時間去。我心諗wtf… 太古城都話遠？搭地鐵一條線都過到去啦。之後我就話我有時間去嗰度，我今次肯定冇博佢嘴。阿媽就即刻問點解係都要遷就你同學，點解唔叫佢嚟中西區食飯？我聽到之後我好嬲，即刻返房喊咗出嚟，我心諗我已經14 歲，去太古城都話危險，唔通我到18歲先可以自己一個去？🤦🏻♀️最後都係約咗去銅鑼灣食…
仲有一次我自己出街，返屋企嘅時候阿媽就問點解我條褲咁短，嗰日我條短褲其實唔係好短啫，都只係喺低過我Pat pat 兩寸倒。之後我阿媽話而家街上好多鹹濕佬，好危險，如果着啲咁短嘅褲會俾人睇蝕曬。seriously wtf 而家街上個個都係咁着㗎啦，有啲人啲褲仲短過我嗰條，天氣而家又咁熱，加上其實嗰條褲以前都着過好幾次，以前又唔見佢話我，不如掉晒我所有嘅短褲啦，好無奈啊⋯⋯我覺得其實一個人着咩唔緊要只要自己鍾意就得，不過我阿媽就唔明呢一點。
仲有一次我我同一個男仔WhatsApp，我阿媽識佢阿媽，所以我阿媽都識個男仔。之後我阿媽突然入嚟我間房就話專心啲讀書啦，愛情依家野遲啲先算啦。我其實鍾意個男仔，但從來冇話過俾我媽聽。根據以上嘅描述，我只係WhatsApp緊，我阿媽其實唔知我WhatsApp緊邊個，唔知點解佢會咁講呢？之後我就話我只係問緊一個同學關於功課嘅嘢，我阿媽就話咁都好啲⋯⋯ 我心諗始終我讀咗女校咁多年，如果真係同嗰個男仔WhatsApp，我真心覺得冇乜所謂，就算佢唔鍾意我，同男仔交流一吓都好呀…
講咗咁耐，我覺得其實我阿媽所做嘅嘢都係為咗我好，好錫我，但係我覺得唔應該用啲咁嘅方法去錫同保護你個女。我同我阿媽關係都其實都幾好，但係我生活咗14年，我其實有好多嘢都係收埋，唔會話俾我阿媽聽，我一講少少一啲佢唔同意嘅嘢佢就會嘈喧巴閉⋯⋯我好羨慕一啲母女關係好好嘅人，佢哋乜都同阿媽講，佢哋阿媽都會願意去聽佢地講，可惜我同阿媽嘅關係唔係咁，雖然表面上好似好有愛。
我其實生活得幾好，成日出去食好嘢，爸媽好錫我，有啲同學都好羨慕我，但係爸媽永遠都唔會知道我個諗法係點。
你哋有咩方法可以增進母女之間嘅感情關係？