#NSS學業
[GUEST] （15/5要面試，希望admin可以盡快出post，辛苦曬🙇🏻♀️）
小妹今年讀緊F.3，學校算係Band1B，成績啱啱好係average高少少，但係真係讀得好唔開心，覺得壓力好大好辛苦，差唔多日日都會喊，都唔知為咩而讀同前途係點，唯一一樣嘅興趣就係Art，衰就衰在呢間學校冇呢個elective
為咗讀Art我就去搵邊啲學校有得讀呢科，結果就搵到兆基，聽咗簡介會之後我都幾鍾意呢間學校，咁我就用咗10年嘅勇氣去同屋企人講，阿媽除咗覺得學費有少少貴之外係覺得ok嘅，但係我阿爺聽完之後就一直鬧我，話我而家讀緊嘅學校好好，學生純品成績又好，問我點解會唔識得珍惜，我而家唔開心根本就唔係我想轉校嘅原因，只係我唔想讀書而搵嘅藉口
佢之後仲話兆基係一間俾爛仔讀嘅學校，太自由完全冇限制，讀唔成書至會入去hea，但係喺我同佢地講之前佢根本就唔知有呢間學校，聽完我講係一間唔係傳統嘅學校至覺得呢間學校一定係差到貼地
咁講咗一陣就當然係嗌交收場，其實我自己了解過兆基之後我覺得真係好好，好重視令學生鍾意返讀書同唔會谷到好攰。雖然大學入學率係低過其他學校，我阿爺都有捉住呢個point同我拗，但入大學真係咁緊要咩？唔入大學都可以有好多發展，仲可能有成就過大學畢業嘅人，全部嘢都好睇個人姐
想問大家我應該係聽佢講定係跟自己嘅意願，我知道如果我成功入咗兆基嘅話阿爺一定會同我反面咁滯，但係唔入嘅話我真係唔知繼續讀我而家呢間中學會有咩前途。同埋有冇讀過/讀緊兆基嘅師兄師姐可以講下呢間學校係我諗得太好定係佢真係有誤解？
先同留comment嘅人講聲多謝，我真係超級超級迷茫。
（PS我會同阿爺講係因為佢讀書好叻，我由細到大都係俾佢教）