#NSS個人
[GUEST] 突然覺得自己好孤單。
平時本身冇咩朋友，知道上次自己一個去海洋公園玩，發覺其實一個人玩仲jeng過同朋友去。
但諗諗下，我一個人去海洋公園玩嘅主要原因係因為我冇朋友陪，我搭車嘅時候越諗越多，突然覺得世上好似冇一個人真正嘅朋友。
我一直好想世界上面有嘅平行時空，嗰度有另一個我，一個了解我嘅人，一個複製嘅我。佢會明白我嘅開心期待同傷心失望，我哋嘅諗法一樣，可以互相安慰，我哋嘅感受、經歷都一樣，咁就可以有一個真正點都唔會離棄對方嘅朋友，因為我就係佢，佢就係我。
當然我知咁係冇可能，所以我只想想要一個可以傾訴但唔會嫌棄我嘅朋友或者陌生人都可以，我想人哋明白我了解，但我又驚我講得越多，其他人就會越討厭我，所以我中學之後就一直將自己收收埋埋。
直到琴晚我實在忍唔住，我聽住“世界上沒有真正的感同身受”呢首歌喺床上面喊咗出嚟，裡面一句“這世上除了我，只有千萬個你”我突然清楚知道，呢個世上，無論我講幾多關於我嘅想法同感受出嚟，都係冇人會完全理解ga。
就好似我小學4年班嘅時候比同一個老師屈咗兩次，對當時嘅我嚟講，我覺得好傷心，我夜晚同阿媽講，佢就話係我唔想翻學嘅藉口。自從嗰次之後我就完全打消同屋企人傾計嘅講法，其實我係想要個安慰或者一個擁抱姐，點解咁都唔得？到宜家我每次諗起呢件事都會喊。
我最後變成只係想要一個，可以比我講野嘅地方，佢可以已讀不回、唔記、唔在意，我只係想抒發我嘅感受。但係我宜家連個咁嘅地方都搵唔到，我只好喺手機記事錄度寫低曬我所以想講嘅嘢。到目前為止，我開左幾個質料夾（文章數量全部都雙位數）
-想法/心事
-夢（夜晚發咗嘅夢）
-抱怨
-花癡日記
-歌詞
-密碼
-回憶
之後仲有幾段30-90分鐘嘅錄音
全部都係我想講嘅嘢，而每次一打一講就停唔到，至少1000字起跳。
其實我真係好中意分享ga，但係又搵唔到適合嘅人，有時候我自己都覺得自己做嘅嘢怪同討厭，更何況係其他人呢？
其實我究竟屬於內向定外向？大家有冇一個真係好了解你包容你嘅朋友？如果有我真係好羨慕