#NSS個人
[Guest] 見到nss有投稿關於身邊冇乜朋友，我都想講下我自己嘅經歷。我身邊冇乜朋友嘅原因，係因為小學嘅時候都發生咗啲事，令我唔夠膽再識新嘅朋友。亦明白咗寧缺勿濫嘅道理（由於係小學時期嘅事，所以有啲小學雞 ，請多包容）
首先，先講下我小學嘅朋友。我同佢係小二識嘅，一開頭我哋嘅友誼都好正常。但係，經歷咗6件事之後，我就開始覺得佢唔係朋友，而係一個“情緒勒索嘅人”。
小學- 第一件事
小二嘅時候，佢每個小息都會搵我玩，我開頭都覺得好開心，因為佢係我起小學嘅第一個朋友。由於我嗰陣係一個唔鍾意睇卡通片嘅小學雞，所以每次佢想同我討論卡通片，我都完全畀唔到反應。「你都唔睇卡通片，咁我哋唔好一齊玩啦！」呢句就開展咗佢對我嘅情緒勒索。就係因為我哋冇共同話題，佢就開始對我有啲反感，唔係好想同我玩。
小學- 第二件事
轉眼間就到小三學期尾，由於學校會揀選學生做風紀，而呢個就係我由小一開始就好想做嘅崗位，所以我好想舉手報名。但係佢竟然好粗暴咁阻止我舉手，扮到好慘咁話「你諗下，你做咗風紀之後，我哋每個小息都唔可以一齊玩架啦。你陪下我啦，我好唔開心啊」。我小學嘅時候，淨係得佢呢個朋友，又唔想令呢段友情消失。所以我就好戇鳩咁放低咗手，嗰一刻我真係好後悔點解要聽佢話，眼見住十個名額都畀其他同學搶曬，好心酸。宜家諗番真係好嬲點解當時要為咗啲咁嘅朋友而放棄咗我嘅夢想。
小學- 第三件事
我細個嘅時候係一個腸胃比較弱嘅人，同時又好細膽。所以上堂肚痛嘅時候都會唔敢舉手，死頂到小息先去。但係呢個朋友會禁止我去廁所，又再次講出嗰句「你諗下，你去咗廁所，我就唔可以一齊玩。你陪下我啦，我好悶架!」當時極度戇鳩嘅我依舊係為咗呢段友誼，決定繼續死頂。冇記錯嘅話，我之後仲有埋腸胃炎請病假，佢竟然話我成日都肚痛！仲鬧我請病假搞到佢好悶，之後就強行要我食杏仁，聲稱會快啲好番。但係我好唔鍾意食，我起呢個時候就開始諗佢係咪一個朋友，因為正常嘅朋友唔會強迫你做啲你唔鍾意做嘅嘢。
小學- 第四件事
小四嘅時候，佢完全當自己係「娘娘」，持住自己早發育對波大啲啲就想收兵。lunch time嘅時候會請男同學食零食，但係當我想用朋友嘅名義去問佢攞零食，佢就好嬲咁話冇我份。佢成日以為班上面個個男仔都好鍾意佢，但係我聽到嘅版本係啲男仔根本唔鍾意佢，佢地只係為零食:) 。除咗lunch time 用零食收兵之外，佢仲當我係阿四，每日遞個飯壺叫我幫佢打開。明明自己都識打開，仲話自己冇力擰開個蓋! 根本就係當我係妹仔，每日都要服侍佢。
小學- 第五件事
其實，我真係明白人總係想將最好嘅嘢留住。但係我嘅朋友所用嘅放式，完全就係一個欺凌者會做嘅事。小息嘅時候，佢每日都要我帶各種各樣嘅零食番去請佢食，每次有oreo，夾心餅之類嘅零食，佢都會挑個夾心自己食咗佢，之後瀨乾淨兩塊餅上面嘅餡，最後留低兩塊餅叫我食咗佢。有任何零食，只要係有特別甜嘅部分佢都會食曬，留番啲冇味嘅畀我。零食都算事小，佢好鍾意偷攞我啲筆，用曬冇墨嘅時候就還番畀我。嗰刻我個心已經決定咗要脫離呢個朋友，但係每次我想離開佢嘅時候，佢都總係會扮到好可憐咁，希望我留低繼續做朋友。
小學- 第六件事(最終回)
有一次，佢約咗我同另一個同學上佢屋企玩。而佢係一個非常鍾意起家長面前曬命嘅人，所以佢就強迫我同另一個同學玩話劇。佢為咗起家長面前顯得好威風，於是就叫我同同學扮壞人，再加佢嘅演技，扮出乖乖女形象。但係我好唔開心，佢為咗貶低他人，抬高自己，可以迫朋友扮衰人。隔咗一陣，佢就想表演自己嘅樂器水平，吸引家長們嘅視線。表演完之後，佢就畀在場嘅所有人去掂佢嘅樂器，就連一個去完廁所唔洗手嘅小朋友都可以掂，唯獨就係我唔可以! 我嗰下激到喊咗，將我兩年嚟嘅所有委屈一次過發洩曬出嚟！最離譜嘅係，第二日番學嘅時候佢好似冇事發生過咁，仲不斷搶我啲公仔嚟玩，但係我好堅決咁拒絕咗。直到小五分班嘅時候，終於唔係同一班，呢段友誼都結束咗。
其實呢六件事都係冰山一角，平時嚟我屋企玩會搶我啲公仔，整爛咗我一套400幾蚊嘅大富翁，每次我有新嘅玩具，文具，佢都會搶嚟用！強迫我食佢口水尾，着一樣嘅衫。仲有幫老師手嘅時候不斷搶功勞。呢啲一件件小事都令我唔夠膽認識新朋友，我覺得一段正常嘅友誼會係互相鼓勵，一齊變好。但係一次又一次嘅貶低，同埋恥笑我手上嘅濕疹，令我對於朋友呢個關係失去咗信心。
不過我好慶幸嘅係，我起中學識到兩個超級好嘅朋友，我哋會明白對方嘅底線，知道對方有咩係唔可以攞嚟講笑嘅。好多謝佢地令我抹去咗小學時期對於朋友嘅陰影。篇文就寫住咁多先啦，好多謝你睇到嚟呢度。
篇文係有啲1999嘅地方，同埋小量錯字，希望屌得細力啲。亦都辛苦曬admins，希望大家可以成功識到更多朋友啦。