#NSS家庭
[GUEST] 我真係唔知應該點做。
有日我發現我細佬喺某個game入面多咗好多唔同角色嘅皮膚，之後我問佢邊度嚟㗎啦，佢同我講話係同學送俾佢。我問點解，佢話因為佢有時會幫同學做下嘢，同學屋企又係做生意，好大方成日請同學點點點咁，我其實本身都唔係好信，但我繼續問落去佢都係咁講，我都冇辦法，唯有信佢。但佢真係打機打到沉迷晒，每日一放學返到屋企就打，打到凌晨兩三點。之後佢出街嘅次數又多咗，我問佢點解你近排成日出街嘅，佢每次都話係同人去打波，同佢嘅接觸都越嚟越少。點知近排發現我細佬俾同學向老師舉報話佢借完錢唔還，原來佢借咗同學成千蚊去課金，每次落街都係去搵嗰個同學。我先知佢一直呃緊我哋屋企人。佢已經遲咗好耐冇還到，個同學先搵老師幫手。然後我哋問佢點解要咁做，佢都係hea答或者唔答，根本唔想話俾我哋知發生咩事。到要見家長喇，佢就用好多藉口唔想去，去逃避。最尾佢就講咗件事出嚟，佢話佢有還錢，但係叫佢俾啲關於有還錢嘅證據，佢死都唔肯俾我哋睇。
返到屋企諗住傾返點條數點返俾同學，佢反而鬧返媽媽轉頭，話佢好煩，唔使佢幫，冇人叫媽媽幫佢，個態度真係好差。之後我諗住問下佢幫下佢，佢又話佢已經講晒出嚟 ，唔會再講，但我心諗：我冇跟你去見家長我點知？之後死都唔講究竟分別借幾多還幾多，又話我哋聽錯嘢，但又唔肯講返究竟係點，佢仲要一路鬧我哋一路打機⋯佢仲話如果要報警拉佢都唔緊要，拉就拉。
其實我哋都係想幫佢，佢仲細個，真係唔想佢學壞。 屋企本來都唔算有錢，又加上屋企有人依家失緊業，真係唔想加重嗰經濟負擔⋯媽媽真係好唔開心，又細到大都教我哋冇特別需要唔好問人借錢，點知細佬去問人借錢係為打機。嚟緊我都要溫final去揀科了，但真係好影響我讀書，成日都諗點樣令到佢好啲，點樣解決佢嘅問題。
想問下各位我應該點樣做去幫手？幫佢又好幫我都好⋯⋯(P.s.我哋都知道要俾啲懲罰佢，但又唔知點罰佢先令到佢真係明白自己做錯咩）
Sor for 1999