#NSS愛情
[GUEST] Topic:祝君安好
–
係你令到我明白乜嘢係一見鍾情
到而家先諗返起原來當初
我由第一眼見到你嗰陣我嘅目光就冇再移開過
當年入到班房見到你嘅嗰一幕
永遠都會留喺我個腦入面
我諗我就係由嗰刻開始
對你有感覺 一開始我以為你對邊個都係勁冷漠
平時你嘅形象就係hi都唔會講聲
每日返學淨係識得瞓覺同黑面
你運動又好 讀書又唔差
正當我以為同你嘅距離遙不可及嗰陣
估唔到竟然嚟緊嘅調位將我哋調埋一齊坐
老土啲咁講 嗰下我真係仲開心過中六合彩
之前望你都只不過係橫跨成個班房偷偷地咁望
點知轉個頭竟然變成伸隻手都已經摸到嘅隔離位
最估唔到嘅係你竟然有反差嘅一面
一齊坐之後慢慢開始變熟
傾下偈就發現原來你都鍾意啲女仔嘅卡通公仔
我仲記得嗰陣好傻仔咁買咗好多畀你
為咗你我將你所有鍾意嘅電影都睇過一次
務求同你有多啲共同話題
其實嗰陣我真係好認真咁認為我哋嘅關係一直有持續進展 但係好似直到我表白之後一切都唔同曬
意料之內地你拒絕咗我
我仲好記得嗰陣你把聲係我前所未見過咁溫柔
我有一瞬間真係以為你嗰個語氣係氹緊我
之後落嚟嗰幾日大家返學嗰陣都好有默契咁唔出聲
之後仲係你主動開聲打破呢個沉默
甚至乎有一日
我哋成班friend喺度玩嗰陣你仲對我做咗啲好親密嘅嘢
(唔講太仔細驚當事人一睇就知)
雖然之後你有威脅過我唔準同人哋講
嗰一下我真係覺得就算你拒絕咗我我一直追你都心甘情願 係之後劇情嚟個180度大反轉
嗰日我同你兩個去睇戲
睇到一半你無啦啦話有急事走咗
之後就有人send畀我睇你原來係趕下場要同第二個女仔出街
嗰一瞬間我真係覺得自己好可笑
回憶返之前嘅種種細節
其實一直以嚟我都係心甘情願做兵仔 畀你玩
你固之然有錯 但係最對唔住我嘅其實都係自己
其實你唔鍾意我呢一樣嘢由一開始已經表現到好明顯
只不過係我一直好天真咁覺得可以用努力打破你對我嘅唔鍾意
自從你同個女仔出完街之後直至到而家我哋一句嘢都冇再講過
當係你放過我 我放過你又好
當時嘅我真係一世都唔想再見到你
嗰陣我真係好驚自己會再踏返入你呢個圈套度
但係事過境遷
但係而家間返三五七年再攞出嚟講嗰陣
雖然我內心仲有你
(有時候都仲係會偷偷地睇你ig story
但係絕對唔係嗰隻鍾意 而係習慣性嘅好奇🤣)
但係呢種感覺已經唔再係鍾意
但係我好肯定你會留喺我內心到直至一段好長嘅時間
你有你行我有我走
縱使呢幾年入面我哋各自都有過男女朋友
但係我都仲係想送一句畀你:祝君安好🙏🏻