#NSS愛情
[GUEST] 我錯過咗一個鍾意咗我好耐嘅女仔
以下A=嗰個女仔
我同A係中學同學，本身我哋係唔識嘅，直至到F2暑假去補習，A遲到左求其揀個位坐就坐咗喺我隔離，我先留意到A原來係同校隔離班同學。喺補習社個個都唔識，見到同校嘅比較有親切感，就令到我更加想認識佢。奈何我真係好怯，補左三四堂都唔夠膽同佢講野，其實我每次見到佢都會有啲緊張，驚自己隨時做錯野喺佢面前出醜，所以就令到我更加唔夠膽同佢講嘢。
諗返其實都覺得自己幾冇用…
A係屬於比較活潑嘅女仔，見到佢同補習社入邊同其他同學傾偈都會傾得好開心。有一次A冇帶計數機，而佢其他frd又未返，個阿Sir就叫我哋坐埋一齊，呢次係第二次A坐喺我隔離，我同佢好近 好近。平時好憎去補習嘅我，係嗰刻真係唔想咁快落堂。A好有禮貌，每次問我借計數機機都會講唔該，就算借十幾次都照講。可能因為我識嘅女仔少啦，但係A成個人真係好有教養。臨走佢仲笑住同我好彩今日我肯借計數機如果唔係佢都唔知可以點算，講完就話拜拜，轉身走咗我依然覺得佢好甜。A每個行為都令到我好心動。
之後我哋一齊補習，有陣時有唔識嘅數都會請教對方，久而久之我哋就熟咗，時不時我會ig覆下佢嘅story，兩個人都傾得幾開心。有次我去問我啲frd知唔知A係邊個，諗住同佢地講我鍾意佢，睇吓佢哋有冇啲咩方法可以幫我更加了解A。但係得到嘅結果係發現咗A有鍾意嘅人，而且都有好多人鍾意佢，鍾意佢嘅人高又高過我靚仔又靚仔過我成績又好過我，我真係乜都冇，點配得上A…
咁又係嘅好似A咁靚女又溫柔大方 點會冇人鍾意
由嗰刻開始，我就覺得自己同佢冇可能，見到佢ig story都盡量控制自己唔好去搵佢，嗰排真係好辛苦。明明同佢日見夜見，但係又要疏離佢，A有陣時都會主動黎搵我，但係我真係覺得自己配唔上佢所以就會hea覆，其實佢講嘅每一句我都有好多嘢想答佢。
後來我諗A知道我故意疏離佢，走嚟問我發生咩事，我又同唔到佢解釋，同佢講咗唔關你事就冇再理佢。A自此之後好少再同我講嘢，我哋兩個好似從此變成陌生人。
前幾日我先知A就嚟要移民，我諗我以後都見唔到佢，呢一刻我真係忍唔住，諗住最少同佢講聲再見都好。於是我就去搵A傾偈，傾到差唔多尾聲佢同我講
「多謝呢三年有你咁好嘅朋友，但係我要走啦我真係想同你講，其實我鍾意咗你好耐，由F2認識到而家，三年啦。雖然當中我唔知發生咗咩事我哋好似變成陌生人，但係每次去補習可以見到你我都好開心，多謝你。」
見到佢講呢段嘢，我真係喊咗出嚟好後悔嗰陣時點解唔放膽去追佢…
你地覺得如果我而家去追佢會唔會太遲？我絕對接受到同佢異地戀，但係咁樣會唔會好阻住佢嘅人生…
好多謝肯睇到呢度嘅你，如果你呢一刻都有鍾意嘅人就去追啦，趁住佢仲喺你身旁，唔試過真係唔知結果。雖然我自己都做唔出勇敢去追，但係我而家真係好後悔，唔想你哋會有同我相同嘅經歷。加油！