#NSS個人
[[Guest] ] 小妹今年中三。話說幾個月前，我就喺網上見到有個好多人都推薦嘅老師，係幫你打理皮膚同埋減肥嘅。咁我自己不嬲都有暗瘡問題啦，就諗住去試下，就加咗呢個老師嘅whatsapp。
但係後尾傾傾下呢先發現原來係要買佢D產品，同埋收費都幾貴下，對我一個學生嚟講就有啲負擔唔起。咁我就諗住拒絕佢啦，話「算啦」 咁。但係佢就係咁同我講話錢同埋身體邊樣重要啲，咁我真係畀佢煩到唔得啦，我就呃佢話老母呢排查手機查得好嚴，就del咗佢whatsapp。
但係就幾日前，佢又搵返我，就問我做乜del佢whatsapp，係咪遇到啲咩問題呀咁樣。我話我而家已經冇暗瘡問題啦，咁佢就話唔緊要，叫我加入佢一個gp，就話會平時喺入面分享啲護膚嘅知識，咁我就入咗去喇，但入面啲人多數都喺度分享緊喺呢個老師度買嘅產品，個老師就嗌我唔好退gp，多啲講嘢。
其實主要原因都係呢個老師佢態度真係好好，又會好細心咁問我有冇咩問題呀咁樣，真係唔係幾好意思咁直接拒絕佢嘅。
但係呢排真係畀佢煩到，成日都會send message去問我呢樣問我嗰樣咁，但就冇再叫我買佢啲產品，我真係好想同佢斷曬所有聯繫但係佢已經有我電話號碼，一開始仲要係我加人先，請問我而家可以點樣做？