#NSS個人
[GUEST] （長文？）小妹升到中學之後性格變咗好多。
小學嘅時候都係超外向，分組lead住成班人，仲要成日上堂傾偈，搞到操行勁差。最近學校做一啲性格統計之類，見到勁多人都揀我係內向被動。的確，升咗中學之後，可能因為學校band 高啲，大部份人都係成績勁好勁主動勁多frd嘅人，搞到我完全冇機會講嘢同埋表達自己。小六嗰陣仲希望自己上堂唔好傾偈做目標，依家真係完全傾唔到計，上堂唔專心最多淨係喺本書度畫公仔，都唔會喺度傾偈。分組嗰陣完全唔講嘢，好似嗰啲唔參與嘅人咁，就算參與都會淨係send個File俾佢睇，完全唔出聲。小學一齊升中學啲frd都話我小學嗰陣好主動，唔知點解升咗中學會咁。
我覺得而家好似人格分裂咁，性格真係好奇怪，對住啲好熟有好大方嘅frd我就會逼佢地幫我做乜嘢或者笑佢咁，有啲frd又唔敢咁做，喺學校同啲同學好似啱啱識好慢熱咁，同好熟嘅frd喺學校又癲咗咁，好似好樂觀咁，返到屋企又po 晒放負story，同啲唔講嘢嘅同學喺屋企又好多嘢講，搞到我自己都好憎自己點解會變成咁。小學同學話我好大膽好勇敢，又話我會好直接講出佢嘅優點缺點，但我覺得自己好細膽，有時網課同同學疊聲都會唔敢講落去。可能係因為群眾壓力，好多圈子？同某啲人唔係好frd但係冇咩機會認識對方？記得啱啱升中頭幾個月都係傻吓傻吓，攪亂檔，上堂好投入成日舉手，可能因為有個同學成日都好鍾意俾面色人睇，有時都會嗗住我阻住佢專心上堂扮乖，搞到我唔敢繼續變返之前嗰個主動嘅自己？（雖然佢而家都繼續嗗我
我知道人始終都會變，但係我真係好唔鍾意而家嘅我，我想搵返之前主動同friendly 嘅我，而唔係而家班房嘅角落生物。