#NSS社會
[GUEST] 最近我哋學校嘅訓導主任突然因為避免學生上堂
偷打機，所以要求所有人將部手機放入個盒裏邊，然後再送上去教員室保管，直到放學。依個政策攪到所有人放學後親自去教員室拎番部手機先至可以走，樓梯放學之後塞住哂，全部人都排喺校員室前拎手機，好鬼麻煩。
好彩訓導主任要求每班班長去檢查我地有冇交手機去個盒度，好多班嘅班長都默許我哋唔交手機，老師同訓導主任都唔會檢查，而且訓導主任都無察覺到呢個現象，所以都可以一直咁樣落去。
直到我地學校嘅新聞社用呢一個現象去做新聞，詳盡講述每一班唔交手機嘅方法，批評訓導主任嘅政策離地同埋荒謬，好鬼無用，好多同學都讚間新聞社勇於批評學校嘅政策，令到新聞社嘅訂閱量急升。當然訓導主任見到咁樣嘅情況，就好貼地咁樣改善左個政策，要求由佢委任嘅風紀親自檢查每一個人，老師同埋訓導主任都會定期突擊檢查。學校嘅新聞社依然繼續係度批評學校嘅政策，佢嘅地訂閱量一樣喺度不斷飆升，公佈學校政策嘅漏洞，而學生又一直係度讚緊新聞社貼地，勇於批評學校政策嘅荒謬……
我非常多謝學校新聞社，勇於公佈學校政策嘅漏洞，令學校可以修復漏洞，完善學校嘅政策。我只係想問下，究竟班同學幾時先意識到學校新聞社一直係度幫助學校打壓學生，令到學生失去反抗的方式同埋機會？
唔記得左講，我就讀嘅學校係叫做香港中學。