#NSS個人
[Guest] 「生蛇」依一個詞語可能你我都知係咩嚟(唔識請google)。通常係啲阿叔啲老人家先會有嘅病。好似距離我哋好遠，但原來可以離我哋好近。而幾年前嘅我就被「生蛇」困擾。
話說18年(15歲)嘅聖誕節前夕，我嘅右手手指尾內側就生咗啲粒粒，當時嘅我以為係汗疹(自己本身容易出手汗)就冇乜點理,過多排啲粒粒就又生多啲，連手掌都有少少。跟住我開始搽嘢，但係完全消唔到。過多幾日，當我掂啲疹就好似比針吉咁痛，嗰時仲要係冬天，要著長衫同埋褸，每次著衫除衫隻右手都痛到黐孖筋(之後上網search過原來生蛇嘅痛楚可以媲美生bb)，結果當然去睇醫生啦。
一坐低我指住啲疹喺度講，醫生一睇啲疹就問我有冇生過水痘，我話好細個有，然之後佢就話咁你應該「生蛇」喇。我當堂打個突，因為當時我以為依啲係老人病，點會關我事。醫生就解釋話其實「生蛇」唔分年齡，總之免疫力差同埋生過水痘就有機會中。咁我就諗起自己依排每日放學唔係練波就係補習，每日返到屋企都起碼六點半，加上要溫書做功課，真係攰到趴喺度。成日希望可以病下sick leave嘅我可能就實現咗(事實係患病期間係聖誕假 我頂!)
就咁成個生蛇就陪我度過假期，右手寫字嘅我做功課就要邊痛邊做，真係痛到唔想做，欠哂佢。仲要一月就考試，真係驚痛到唔係好寫到字。好彩佢係考試之前就唔再痛變咗膿。成個病用咗一個月先斷尾(平均都要咁耐)
咁我打依篇嘅目的除左分享生蛇嘅經歷之外，就係想叫睇緊依篇文你多多休息，唔好搞到自己咁殘。人冇事先做到世界冠軍㗎嘛～
Sor for 1999
希望可以po ig 辛苦哂admin們