#NSS個人
[[GUEST]] 長！文！慎！入！😖🙏🏻
是咁的，小妹係一個數學好差好差好差嘅人，真係差到可能會令到教我數嗰個人爆血管嘅程度。
由細到大幾乎冇補過習，所以都冇乜補習嘅習慣同埋經驗，咁因為我成績真係太差，所以之前first term家長日嘅時候，班主任（數學老師）就建議我搵一搵補習，其實我一直都物色緊，不過就仲未搵到。
好快去到final exam，咁即係而家啦，我哋學校分開好多日嚟考，前幾日就考咗數學，其實我都知我衰，本身數底已經係近乎零，然後考試前又幾乎冇操過數咁滯，淨係不停喺度背formula。（我都知數學根本唔可以咁樣溫，但係講起都一匹布咁長…我成日都冇精神溫書，尤其是面對自己差嘅科目嘅時候，會特別有挫敗感然後唔想溫）
吖唔好意思扯遠左，入返正題先，我考數嗰日，做緊卷嘅時候簡直係不停標冷汗，坐喺個hall度又焦慮又緊張，望住啲題目眼甘甘咁，揸住支筆卻完全無從下手。差唔多題題都唔識咁滯，第一題唔識就走去睇第二題，睇咗好耐都唔識又skip咗佢去睇第三題，如此類推…嗰種完全唔識做、寫唔到半粒字出嚟嘅感覺真係好煎熬…做到中段我甚至想喊出嚟，不停好緊張咁腳震震，成個人連神色都變埋，我哋考足一個半鐘，我嘅狀態幾乎崩潰，我真係唔知點好，好想大嗌，情緒好抑壓，同時亦好嬲前幾日完全冇的起心肝溫書嘅自己…
我哋考數學MC同long q係分開考嘅，但係test就係放埋一齊。之前有一次test，我長題目改到完全0咗，僅有嘅分數全部都係嚟自撞返嚟嘅MC。
去到我而家寫緊呢段文字嘅呢一刻為止，數學考試已經過咗好幾日，但係我每次一諗起我做緊卷嗰陣嘅情景，都會覺得好後悔好想喊，我唔知點好，我好驚自己到時份卷會寫住0，我好清楚明白就算到時真係0咗都係我自己攞嚟，根本係咎由自取自食其果，但係我好後悔，我真係好想喊，而家呢一刻我唔知應該點樣面對到時收返份卷嘅自己。我完全面對唔到老師，更加面對唔到屋企人…
我覺得好抱歉…我好想打死自己，我好想可以時光倒流俾我考多次…