Guest

#NSS個人

[Guest] 希望admin可以po ig la，辛苦晒
長文慎入 有錯字或者唔清晰嘅句子希望大家可以體諒
我今年f1，本身自己就有少少唔好嘅回憶，一入到中學就更加大壓力，我開始懷疑自己有情緒病，前一兩個月我已經透過網上輔導員搵咗學校社工，多數同佢哋傾完之後個人都會舒服好多，但冇幾耐，心情又會變翻差，最近d情緒好似越嚟越唔好，所以我想睇心理醫生，但係我唔知應該點開口，我盡量寫少d去講吓我d狀況，我覺得自己又好似有病但又好似唔係，但呢種狀況係好耐之前就有，最近先變得更加差，想大家俾少少意見我應唔應該睇醫生，如果應該的話，可以點開口同社工或者媽咪講（阿媽唔知我搵社工）。
1.我成日都會諗起好多事，個腦會好似播緊片咁不停回憶起之前一d唔好嘅事
例如我爸爸癌症末期嗰陣睇住佢講唔到嘢連隻手都活動唔到嘅畫面（之後call咗白車，冇幾耐就走咗）、我嬤嬤跌親我扶唔到佢嘅畫面（之後佢中風過咗大約一年幾就走咗）、同朋友鬧交嘅回憶，仲有好多好多，有時都覺得某d回憶係好少事，但係我點都忘記唔到
2.成日自己一個或者夜晚嘅時候就好想喊，有時都唔知點解，不過成日都忍住（社工有幾次都話我同佢傾嘅時候唔喊，其實我好想喊，但係當住人哋面前我唔想咁），有時喊會將自己反鎖喺廁所幾個鐘，直到自己冷靜翻為止，不過出嚟仲係好唔開心
3.專注唔到，我欠交咗唔少功課（10份可能有兩三份欠交），有時我都懷疑係唔係電子產品影響、屋企電視太吵、好熱呢d原因，但係後來我試過溫書唔用手機平板、去自修室、冥想令自己平靜d、聽白噪音等等呢d方法，都係冇用，有時下午打開份功課到咗夜晚都未做完，溫書完全專注唔到
4.最近開始成日都好攰，冇動力，我最近一日時間加埋晒瞓咗成十幾個鐘，之前我瞓7-9個鐘就可以全日都咁精神，唔瞓都可以勉強上一日堂，而加我瞓完又攰唔瞓又攰，飲完咖啡係可以唔眼瞓，但係個腦諗嘢好慢，同埋因為我細個食錯嘢病咗一次之後腸胃一直都唔係幾好，飲咖啡我都好容易會肚痛，所以唔係經常飲，洗面飲水個d全部都冇用
5.個腦會浮現一d自殺計劃（冇試過執行），成個自殺畫面喺個腦進行咗一次，d畫面好清晰，同埋我經常諗一d留俾重要嘅人嘅說話，我之前都寫過出嚟，我幾乎晚晚都想自殘，但係我驚太多痕我屋企人會見到，我好多時候都有控制住自己，但有時情緒太差我控制唔到
6.我好多時候都好暴躁，少少事都好想鬧人，有時我屋企人叫我，我都會對住佢勁大聲咁講嘢，我好唔鍾意自己咁樣，好唔孝順，但係我有時真係控制唔到，我覺得好對唔住我屋企人，佢好辛苦咁照顧我但係我成日都咁樣對佢
7.我成日都唔知點解好想大叫，冇原因。心情一唔好個心就好似扯住扯住咁（？sorry啊我唔係幾識形容呢種感受），有時又唔知點解突然出現一種好緊張好擔心嘅感覺。又會覺得大家都好唔鍾意我，一定成日講我壞話，屋企人想唔要我之類嘅嘢。然後呢樣我唔知係唔係正常，我多數都係眼瞓先會瞓，所以我有時9點幾就瞓有時到咗3點幾都唔瞓（翻學日子嘅情況），如果定咗某個時間我就會失眠或者醒咗之後攰過唔瞓。
因為我睇過好多網站都有寫呢d徵狀可能有情緒病，做過好多網上問卷都話我有病，我知道唔可以盡信，所以只係作一個少少參考，但係我覺得而家唔似係本身嘅自己，我開始控制唔到自己情緒，影響咗我好多嘢，學業係最大問題，我知道我學個啲嘢只要用心溫，放時間，就會有唔太差嘅表現，我好想努力一次，但係自己一直打擊自己，我每次見到身邊個個都進步緊，我就原地踏步，我覺得自己好差，我希望我可以做翻好少少，其次係家庭關係，我每次見阿媽都講唔超過10句，我希望之後可以多d同媽咪分享自己遇到嘅開心事。最後希望可以控制好自己情緒，每日都開開心心，好好享受每一日嘅生活。
多謝你哋睇到呢度，我係諗到咩就寫咩，可能有重覆嘅位置、勁多重覆字眼，同埋有少少位唔知講緊咩，我而家個腦好混亂，希望你哋唔好鬧得咁盡，同埋俾少少建議我啦，我真係想自己可以搵到解決辦法，令自己好翻同變得更好。
sor for 1999