#NSS個人
[Guest]
依篇文少長，如果有啲位睇唔明嘅話唔好咁執着，小弟文筆唔好
小弟因為近排嘅事過得好迷惘。我15歲，成日同阿爸嘈交，嘈交嘅原因都幾廣泛，有陣時因為成績，有陣時就係因為個人嘅問題
我本來英文唔好，有陣時考試都唔合格，跟住我阿爸就對依件事好執着，我知佢執着喺對我好，但係我覺得有陣時真係over咗，好似只要我一唔合格，佢就話我成日掛住打機唔溫書，係咪唔想讀書，如果我啱啱好合格，佢都係咁講，我知道英文成績係對我好重要，但係我其他科考得好佢都冇讚過我，例如我數學科學嗰啲科比較好，考到高分，佢唔理，我已經同佢講我有努力過，唔係嘅話我依幾科唔會咁高分，跟住佢就話依啲係應份，冇咩嘢好值得讚，成日聽佢講我都覺得好灰，好似自己真係冇努力過，就算有努力都白費，我好唔認同佢講法，但係我又駁唔到佢。跟住佢就話我如果任何一科唔合格嘅話就扣我嘅飯錢，本身我嘅飯錢都唔多，每一餐得$40。
因為個人問題我同佢嘅關係越嚟越差，好似近排佢係我間房用完啲嘢，我放學返嚟見到佢就咁劈晒喺度，我叫佢入嚟執返，可能我當時啱啱放學返嚟，天氣熱所以有啲燥，所以大聲咗啲，佢聽到之後就話我咩態度，跟住我同佢講係我大聲咗對唔住，但係你可唔可以嚟執返，聽完呢句佢就反問番我話你執有咩問題，跟住我話返佢「你成日叫我有手尾，但係你自己又唔做」，跟住佢聽到就撻着咗佢，話「我成日幫你執手尾，而家幫我執少少有咩問題，你幫我整返好啲嘢係你嘅責任，依家係我養緊你，唔係你養我，我叫你做乜就做乜，你冇得唔做，再唔係你就走唔使我養」。聽完呢句之後嗰一刻我真係有衝動想打佢然之後走咗去唔返嚟，但係我阿媽就喺度叫我哋兩個唔好嘈，成日搞到家嘈屋閉，之後我阿爸仲加多兩句話「你讀書又唔成，嘢又唔幫手做，你係咪想喺度做寄生蟲，讀唔成書就快啲出去做嘅，唔係喺度嘥我啲錢同埋時間」聽完呢句我真係想爆喊出嚟，之後我就返咗房鎖埋門，去到夜晚先出返嚟。
我想問其實係我有問題定係佢有問題，佢成日都用錢來衡量所有嘅，令到我自己都覺得我嘅價值觀有少少俾佢改變左，好似咩都同錢關事，有幾次夜晚都匿埋喺度喊，有諗過自X。有冇同路人可以答下我究竟係我有問題定係佢有問題。睇到依度嘅各位好感謝你，肯聽我吐苦水😉
Admin可唔可以post IG，萬分感激