#NSS家庭
[GUEST] 小妹今年中二，忍咗咁多年真係忍唔住想造反。
今日父親節，但係往往呢啲節日，屋企就會大吵大鬧。我唔敢去憧憬，家庭風平浪靜已經係我嘅願望。
但今日……話說我嗰陣溫緊聽日嘅考試，全神貫注目空一切。我阿爸吩咐咗我一陣幫佢做啲嘢，但當佢叫我嗰陣，我真係好專心溫緊書聽唔到，就冇應，結果佢語氣好惡咁叫我，我咪都係有回應佢……但之後佢仲得寸進尺，爆埋粗鬧我，又話我係特登唔幫佢做嘢。我都俾佢鬧到毫無顏面，喊到涕泗滂沱，含住口矢口否認，佢唔聽。我被迫承認，佢仲鬧。
其實係佢錯定係我錯？固然我聽唔到佢講嘢係我不敬，但佢呢個態度係咪真係好大問題……
十四年嚟佢都係咁。唔單止對我，對我阿媽都係咁。
我阿媽有次因為一時疏忽，計盈利計錯，我阿爸又爆粗鬧。呢個我已經習以為常，但佢之後仲要喺我哋訓緊覺嗰陣係咁踢門，由凌晨一點踢到三點，斷斷續續，我阿媽已經係咁喊住道歉，仲係咁，第二日仲要返學啊大佬……
細個嗰陣已經係咁，屢屢冤枉我哋。嗰陣仲衰，直接打到我阿媽成個頭腫哂，我都未能倖免。呢個情況之前一個星期就一次，直到最後我哋搬走咗一陣，佢又用啲「甜言蜜語」引我哋返嚟繼續虐待……
In an addition，佢仲要unemployed咗兩三年，唔肯搵嘢做，日日喺屋企無所事事，但我阿媽搵錢又咁辛苦，佢從來唔體諒下。
點解要俾我遇到咁嘅阿爸……我阿媽又情深幾許，連佢咁都唔肯離婚。
我都想反抗，打算大個用盡一切辦法，令佢受到法律嘅制裁，但我咁樣其實會唔會過分咗啲？定係呢個情況仲情有可原？
原諒我喺父親節講啲咁嘅嘢，但父親節已經唔再屬於我。