#NSS社會
[GUEST] 「真相，你搵到又點啫？」，張潤衡先生係八仙嶺山火事件過咗好耐，2015年7月3日接受蘋果動新聞嘅節目《壹錘定音》訪問俾人問到想唔想知道八仙嶺山火事件嘅真相咁樣講嘅。
我可以咁樣回應張先生：見到蘋果日報今日即將被滅聲嘅時候，就知道搵到真相有幾咁重要❗️
有啲人話可以支持其他網媒，「終結蘋果大台」，唔使再留戀喺蘋果日報，因為佢過去有啲報道係受到爭議，但事實唔係咁，因為今日蘋果日報冇得繼續，聽日不論係立場新聞、眾新聞、MyRadio呢啲網媒，一樣都係冇得獨善其身，只會係下一個俾人針對嘅對象。
喺政權眼中，只要擁抱、追求真相嘅人，每一個傳媒、人都係蘋果日報，都係想要消滅嘅對象。
我好記得當時仲係新界西民主派初選候選人嘅黃子悅喺舊年7月3日選舉廣告嘅一句說話：政權能控制人民的言行，但卻無法控制人民的思想。
所以相比「蘋果撐唔撐到落去」、「買唔買《蘋果》」嘅討論之下，更加希望大家係撕破香港仲有新聞自由嘅假象之後，香港人仲可以繼續有一個獨立嘅思想。
香港人真係要珍重。
– – –
以下引述香港蘋果日報：
【2021年6月21日 – 9點半蘋果新聞報道 最終回】
「由舊年10月5號啟播到而家，多謝大家喺過去260個夜晚，每一晚支持我哋。
前路難行，祝願大家平安。亦都希望即使少咗我哋呢個平台，香港新聞工作者，都可以繼續緊守崗位，捍衛真相。
最後感謝咁多位主播、編輯同幕後編導嘅努力，喺蘋果成就一個不可能的任務、一個回應時代的任務。
再次感謝各位觀眾嘅支持。香港人珍重，有緣再會，bye-bye。」
重溫《9點半蘋果新聞報道》最終回：https://youtu.be/BsvcMNoGHqQ
圖Link: https://ibb.co/Zm099S0