#NSS個人
[GUEST] 6月22日，我又午夜夢回。唔知點解呢一年好頻密咁發惡夢，總會諗起小學不堪回首嘅往事，令我決定喺今日投稿。
四年前我仲係小學六年級，嗰陣我有三個女仔朋友A,B同C，我哋鬧過三次交，基本上都唔算鬧交，而係我被單方面疏遠。
我用自己角度了解到嘅係，每次挑起事端嘅都係C，佢可能係前一晚突然諗我做嘅嘢好可疑同做錯啲乜，然後第二日返到學校同AB討論，再達成共識疏遠我。
四年過去，我對細節嘅記憶已經好模糊，所以唔可以好詳細咁描述。我記得頭兩次鬧交我都去搵佢哋解釋，兩次地點都喺女廁令我覺得呢個地方簡直就係審問室，解釋完就會和好。第三次佢哋入咗廁所等我去解釋，C趾高氣揚嘅態度令我懷疑佢係咪好想踢走我，佢哋每次審犯嘅態度令我覺得我好似唔係佢哋嘅朋友，而係一個真正嘅犯人。我坐喺班房開始猶豫應唔應該繼續落去，但係有三次就會有更多次，我冇可能真係次次都去為啲雞毛蒜皮同佢哋解釋，所以最後我冇去到，我哋就咁絕交，我嘅惡夢都算係由呢度開始。
由於AC喺班影響力大，其他同學為咗唔得罪佢哋都疏遠我，ABC同其他熟嘅男同學一齊玩欺凌。舉一啲例子，佢哋用我嘅擦膠搣爛扔我，我嗰陣安慰自己都算係第一次體驗到畀人扔擦膠係咩感覺。有一次佢哋打去我屋企然後講啲唔好聽嘅說話鬧我例如八婆嗰啲，我都幾傻冇cut線繼續聽下佢哋可以講得出啲咩嘅說話，最後聽到佢哋鬧完cut線，第二日佢哋喺學校完全冇提起過，令我都有種佢哋冇打嚟鬧我嘅錯覺。我當然試過向班主任求助，但佢叫我以佢哋嘅角度諗下點解佢哋咁對我，我返到屋企好認真諗過再話畀佢聽，佢話我諗得唔夠並冇幫我制止佢哋。我知道啦，成件事根本就係我嘅錯，我抵死我應該要承受呢啲野，呢個答案是否滿意？
我都有同屋企人傾訴，我好想講我喺學校過得唔開心但係好難以啟齒，我講到一半佢已經太攰瞓著左，所以最後我選擇埋藏喺自己心底。
但係埋藏喺心底有個壞處，傷口唔會好轉，只會不斷惡化。每日返學壓抑住上堂
，放學返到屋企情緒就開始翻滾，大喊大叫、自我懷疑「我根本就係一個垃圾，跳樓死左佢哋係咪就會原諒我？」「我唔係人」「我根本唔適合交朋友」，命得一條，我唔捨得死，我驚痛，我驚我屋企人會喊，我根本唔知可以點做。
好彩我迎嚟左一個人生嘅轉捩點，升中派位，我派左一間好好嘅學校，我識到新嘅朋友，原本我嘅人生已經改變唔再痛苦啦。但係呢段黑暗嘅回憶埋藏得耐，已經喺個心生根發芽，我制止唔到呢棵樹生長，我夢到AC突然嚟咗我學校，我嘅朋友成為左佢哋嘅朋友，我對我嘅朋友有信心，但我都係會好驚，我又開始沉溺喺呢片充滿住痛苦黑色嘅海，我每個禮拜都會諗起，究竟我可以點做？喺secret見到其他人受欺凌嘅經歷，我知道我經歷嘅已經比其他人輕，但係我都會覺得唔開心同痛苦，我好討厭佢哋，憑咩要原諒佢哋，到死我都唔想見到佢哋，我好討厭咁負面嘅自己，點解我唔可以日日都開開心心？
已經四年，而家對任何人傾訢對我都已經冇任何幫助，究竟點先肯放過我？憑乜要得我一個永遠埋藏喺小學呢段往事入面？
多謝你哋用心睇完
Sor for 1999