#NSS愛情
[GUEST] 嗰一日，我終於同佢分左手。
我地係喺網上面識既，仲記唔記得我一開始係用小遊戲同你答爹，你仲尷尷尬尬咁配合左我。我地好快就一齊左，計返起我地都一齊左3個月。講出黎都驚俾人笑，可能d人會話3個月就唔好攞出黎講啦。但係我想講，喺我既經歷入面，我最認真、最重視既就係呢段感情。
直到依家，我都仲記得好多我同你之間既回憶，因為我唔太識搵一啲有新意或者比較有趣啲既地方或者事黎同你去或者做，而且我都唔係太識plan行程，所以每次約你出黎，我都淨係識帶你行街睇戲食飯。因為咁，所以一直以黎，只要你有嘢想食，有嘢想睇，有嘢想做，我都會盡量同你去，甚至你話睇一啲大陸戲，我都同你去睇。我將自己條底線越拉越低，我感覺自己越黎越唔似自己。同你拍拖，我好似變左另一個人咁，老實講其實有啲辛苦。
我諗我同你分手既原因並唔係一朝一夕就造成既。你同我都未足夠成熟，大家都未諗清楚就一齊左。但係，我從來都無後悔過同左你一齊，甚至同你一齊既時候，我會驕傲當時自己做左呢個決定。可惜現實係你我既經歷唔夠，好多嘢都唔識點樣面對或者處理。好多時候我都淨係識發脾氣，可能就係因為咁，我將我地2個之間既距離，越推越遠。
係呢段關係入面，我自問對你好好，但係呢種好可能對你造成困擾。好記得你同我講過：「你對我太好喇，每次明明係我錯，但係你都攞曬d錯黎認」依家我諗返，其實係因為我唔想失去你，所以無論妳錯幾多次，我都同自己講要原諒你。去到一個點我覺得自己真係好痴線，成日因為你一啲小小既動靜，就胡思亂想。
不過，我覺得自己咁樣係情有可原。雖然我話原諒你之前做過既事，但係因為呢d事，我心入面一直都有條刺喺到。而就係因為呢條刺插得太深，所以只要有小小動靜，我就會好大反應，搞到我好無安全感。
同你分手差唔多一個月，一開始我覺得我呢個決定做得好啱。因為我覺得我想拍拖，都只不過係想搵個可以陪伴我既人，所以無論係邊個都得。我覺得如果今次分左手之後，咁咪搵個第二個囉。但係時間慢慢過去，我發覺唔係人人都可以做到呢個角色，雖然你曾經令我傷心過，令我好嬲過，但係你都有令我開心過。所以如果可以，我真係想同你一齊返。我想今次試下用真實既自己同你拍一次拖。
希望你有緣睇到呢篇文。